واحد ضايع

رمضان كريم

2009-08-12T00:25:00.003+03:00

كل عام والجميع بخير

ايام تفصلنا عن شهر الخير والرحمة

فقولوا معي اللهم بلغنا رمضان وارزقنا صيامة وقيامة وتقبلة منا خالص لوجهك الكريم

طيب ايه رأيكم نخلي التدوين لة قيمة مضاعفة في رمضان

يعني " وده على سبيل المثال وليس الحصر" نخلي تدويننا في رمضان منحصر في الثقافة الدينية

سواء كانت محاضرات او اجزاء من كتب او ادعية وابتهالات

وبرضه ممكن نشجع بعض على بعض اعمال الخير زي الاتفاق على قراءة القرآن مع بعض

وممكن كمان حفظ القرآن وممكن نسمع على بعض على الماسنجر مثلا

فيه اكيد افكار كتير ممكن تيجي من ناس كتير منكم واكيد ده انشاء الله هيكون احد اسباب زيادة ترابطنا لاننا هنكون بنساعد بعض في طاعة الله

دعاء الرسول (صلى الله علية وآله وسلم) عند رؤية هلال شهر رمضان

" اللهم اهله علينا بالامن والايمان, والسلامة والاسلام, والعافية المجللة والرزق الواسع, ودفع الاسقام, اللهم ارزقنا صيامة وقيامة وتلاوة القرأن فيه, وسلمه لنا وتسلمه منا وسلمنا فيه"

دعاء الامام علي عند رؤية هلال شهر رمضان

" قل اللهم اني اسالك خير هذا الشهر فتحه ونوره ونصره وبركته وطهوره ورزقه, واسالك خير ما فية وخير ما بعده, واعوذ بك من شر ما فيه وما بعده, اللهم ادخله علينا بالامن والايمان والسلامة والاسلام والبركة والتقوى والتوفيق لما تحب وترضى"

اللهم صلي على عبدك ونبيك ورسولك سيدنا محمد صلاة وسلاما تامين متلازمين إلى يوم القيامة وعلى آلة وصحبة اجمعين

بدون عنوان

2009-08-10T16:16:00.000+03:00

كنت باتكلم مع الصديق ابو العريف وكنت ناوي اكتب بوست علشان حاجه اتفقنا عليها لكن ياللاسف

قبل ما اكتب وانشكح قرات قرار الحكومة الرشيده بتاع ترشيد استهلاك النت

مش عارف ليه اول ما قرأت الخبر افتكرت نكته كوبري اكتوبر

هقولهالكم للي مش عارفها

بابا مبارك ربنا يبارك لنا فيه جاب عمو نظيف الي تعهد بتنظيف جيوب كل المصريين لاخر مليم ودار بينهم الحوار التالي

مبارك - يانظيف انا عاوز اعمل حاجه الناس تفتكرني بيها ونداري شويه بيها على البلاوي الي بنعملها

نظيف - بسيطه يا ريس نخلي الي يطلع كوبري اكتوبر يدفع 10 جنيه الناس هتهيج انت هتلغي القرار والناس هتصقفلك

مبارك - ممتاز يا نظيف نفذ

بالفعل تم صدور القرار ونزل السيد الرئيس لمتابعه الموقف

ملاقاش الي حاجه

كل واحد بيدفع ال10 جنيه ويمشي من سكات

مبارك - ايه يا نظيف الناس لا هاجت ولا حاجه

نظيف- بسيطه يا ريس نخلي الي يطلع يدفع 10 جنيه والي ينزل يدفع 10 جنيه

مبارك - حلوة كده اكيد مش هيسكتو نفذ يا نظيف

مبارك يتابع الموقف وبرضه مفيش اي حاجه كل واحد بيدفع ال10 جنيه وهو طالع وزيها وهو نازل من غير ولا كلمه ولا اي حاجه

مبارك - ايه يا نظيف محصلش برضه اي حاجه

نظيف - بص يا ريس انا هعرف اخليهم يعترضو هنخلي الي يطلع يدفع 10 جنيه وهو طالع و10 جنيه وهو نازل وياخد كمان قفا على قفاة

مبارك - نفذ اما نشوف اخرها ايه

مبارك يتابع الموقف والناس طوابير عند المنزل كل واحد بيدفع ال 10 جنيه وياخد القفا وينزل من غير ولا كلمه

لغايه ملقى راجل صرخ وقال حرام مش كده وعمال يزعق

قال بس فرجت اهو واحد نطق

مبارك - مالك بس يا مواطن فيه ايه معترض على ايه؟

المواطن - ياريس مش معترض على الفلوس ولا على الضرب بس زودوا عدد الناس الي بتضرب شويه علشان الزحمة :)

المصيبه ان رئيس الحكومه المفروض انه راجل بتاع نيله علم

والانيل انه راجل بتاع هباب اتصالات

طيب فيه بقى سيناريو تاني خالص انا تخيلته غير التحليلات الكتير الي قرأتها عند الكثير من الزملاء

الانتر نت النهارده اصبح ليه دور مؤثر زي ما حصل مثلا في موضوع اضراب 6 ابريل وزي مواضيع التعذيب في اقسام الشرطه وغيرة

وطبعا لان عندنا حكومه انصح من ام اي حكومه لاي شعب صايع

قررت انه بدل ما تغلق مواقع او تعمل بروكسي او غيرة لا

الافكار المنوفيه تشتغل

ايه يوجع المصري

جيبه

خلاص غلو النت علشان يخفو علينا

ادي القصه

يعني من الاخر لا فيه استهلاك غير عادل ولا غير سوسن

الموضوع الحكومة المتهالكه بتحمي نفسها

يعني عاوز تشتم في الحكومه وترفع افلام الفضايح بتاعتها تدفع بقى يا حلو

ودي مجرد البدايه

لو مشيت بكرة هتلاقو فكرة تانيه اوسخ لغايه ما النت ده يصبح شيئ صعب المنال

طبعا الموضوع يعكنن اي حد بس ادينا هنشوف هيرسى على ايه وانا متاكد ان الجماعات الحقوقيه مش هتسكت واعتقد انه هيبقى فيه مواقف اكبر من الاعتراض بايميلات ومش بعيد انها توصل لمظاهرات اصل خلاص كده كله جاب جاز

ما علينا

الموضوع الاصلي بقى الي كنت عاوز اقوله اني طبعا من باب الني اتغظت جدا من تجمعكم قررت انا وابو العريف اننا نجمع الاخوة المدونين المشردين في الارض في السعوديه علشان يبقى اول لقاء لينا سويا طالما اننا كلنا في غربه واحده

وده هيكون انشاء الله في العيد " طبعا لان كل واحد منا في مدينه وبيننا مسافات ولا بتاعه ناديه مصطفى "

وبكده مش هيكون فيه مدونين احسن من مدونين انتو بتتجمعو في القاهرة واحنا كمان هنتجمع هنا :P

بساء الخير

2009-08-05T11:02:00.002+03:00

طبعا لو قلت لكم اد ايه افتقدت الجميع وافتقدت المتعة في القراة في مدوناتكم مش هتصدقوني بس فعلا والله افتقدت الجميع الفترة الي فاتت وكان غصب عني فعلا كنت في مرحلة صعبة مكنش عندي اي مقدرة على الكتابه او حتى التفكير غير في دوائر محددة كانت هتصيكم باكتئاب مزمن لو كنت شاركتكم فيها.

طبعا انا امامي حاجه بتاعه 13 29 يوم ى ما اخلص اللف في مدوناتكم واعرف اخر اخباراتكم الفنيه والعقليه " دة لو كان لسه باقي :) "

النهاردة كنت بافكر في موضوع سخيف وبما انه سخيف قلت اشارككم فيه وآخد رأيكم " شريييييييييييير"

هو موضوع على قدر ما تسبب لي في قلق بالغ لكن اصابني ايضا بنوع من الاحباط المتوازي مع القلق

ابنتي الكبرى " لولو" اصبحت مراهقة

واحد يقول لي طيبب عادي ايه يعني ؟

هعرف علطول انه معندوش عيال من اصله او ولادة لسه صغيرين فهجاوب وهقول بكرة تعرف ياخويا يعني ايه

طيب المشكله فين

مشكلتي مش مع التغيرات النفسيه المصاحبة لمرحلة الانتقال من الطفولة للمراهقه خالص لان بصراحة زوجتي الحبيبه متوليه بحرفية بالغه الموضوع ده وعارفه تهندله ازاي ومفيش اي مشاكل والدنيا كانت بيس جدا

المشكله فيا انا

الي حصل كالتالي

لولو من يوم ما اتولدت مفتكرش اني في يوم من الايام ولاي سبب ضربتها بالعكس يوم ما كانت في كي جي 1 ومدرسه مش ضربتها لا لمستها من كتفها رحت فرجت امه لا إلة الا الله على المدرسه كلها من اول مدير المدرسه للفراشين وصوتي كان جايب 3 احياء مجاورة.

لولو طول عمرها تموت من عقاب واحد مني وهو اني اخاصمها

يعني كان كفايه اني اقول اني مخاصمها علشان حاجه علشان تنفطر من العياط في محاوله لصلحي مع كم غير عادي من الاعتذارات والتعهد بعدم عمل الشيئ ده مرة تانيه. ده غير انها بصراحه كانت من الاطفال الي غلطاتهم مش كتير يعني مكنتش كل يوم والتاني زعلان منها بالعكس كانت تصنف على انها من الاطفال المؤدبين.

يعني كان زعلي منها عندها له قيمه كبيرة قوي جايز اكبر بكتير من زعل مامتها حتى

الموضوع ده في يوم وليله انتهى واختفى ومش اختفى وبس لا اتعكس

الي حصل انها عملت موقف مع مامتها معجبنيش فقررت اني اتبع نفس الاسلوب وجبتها وفهمتها ان الي عملته شيئ زعلني وغلط وبناء عليه لغايه ما تصححه مش هتكلم معاها ومش مسموح لها باستخدام الكمبيوتر ومحرومة من متابعة البرامج الي بتابعها في التلفزيون.

ايه رد فعلها؟

ولا حاجه

بالعكس وقفت مصرة انها ليست مخطئة وان موقفها سليم

طبعا انا مسبتش كلمها كده بالعكس مسكت دفاعها وفندته لها علشان العقاب ميكونش بلا سبب منطقى ولازم تكون مقتنعه انها غلطانه وإلا العقاب مش هيبقى له معنى

اكتشفت في وسط الحوار انها بتتحاور من مبدء العند لانها متاكده اني هبذل كل جهدي اني اثبت لها انها غلطانه علشان قيمه العقاب فهي بتلاعبني!!!!!!!!

طيب خلص النقاش وبدأنا في تنفيذ العقوبة

ايه كان رد فعلها؟

ولا الهوا

دخلت تنام

ولما صحيت؟

قعدت مع اخواتها شويه صغيريين ودخلت تنام تاني

وتاني يوم

نامته كله

وتالت يوم

مخرجتش من اوضتها

المحصله

العقاب معملش اي تأثير معاها

طيب هل دي المشكله

لا طبعا

هم مشكلتين

المشكله الاولى مشكله تربوية ودي الي عاوز اخد رأيكم فيها وبالذات الي ليهم بنات في نفس المرحله العمرية المنيله ب 60 نيله

طالما العقاب العادي دي اصبح غير مؤثر اعمل ايه ؟

ماهو انا مستحيل اضربها لما بقت طولي ده انا معملتهاش وهي نونة لسه

المنع من النلفزيون والكمبيوتر برضه معملوش اي تأثير " دماغها جزمة زي والديها هنعمل ايه في ام الوراثه؟ "

حتى اننا مناخدهاش معانا واحنا خارجين مبقاش بالنسبه لها عقاب !!!

لغايه الصيف الماضي يعني مش بحكي من زمن بعيد لولو كانت ترفض تماما اننا نخرج ونسيبها سواء لوحدها او مع اخواتها او حتى لما كنا في مصر مع جدودها او خالتها او عمتها او اي بشر

كانت ملتصقه بينا جدا لدرجة انه يوم عيد ميلادي الصيف الي فات خرج انا ومامتها نسهر وسبناها هي واخواتها عند جدها ومع خالتها اتصلت اكتر من 20 مرة لتعلن رفضها للوضع وقرفتنا السهرة كلها

دلوقتي بالعكس

هي الي بترفض تخرج معانا وبتتمنى اننا ناخد اخواتها ونخرج علشان تقعد لوحدها من غير وش تتفرج على التلفزيون ان تعيش مع الانترنت !!!!!!!!

طيب دي كده المشكله الاولى

المشكله التانيه مشكله معايا انا

وهو اني فجأه افتقدت بتوتي الصغيرة

افتقدت الي كانت بتنط في حضني اول ما ادخل من باب الشقه

فجأه لقيت واحده غريبه معايا في البيت

بجد فجأه

والواحده دي زعلي مش فارق معاها في حاجه خالص

حتى مع وجود اخواتها وانهم لسه في مرحله الطفوله واعتقد ان الفرق الي بينها وبين اختها الاصغر منها مباشرة "4 سنين " هيخلوها لسه شويه عقبال ما توصل للمرحله دي بس لولو كان ليها وضع خاص غير حتى كل اخواتها لانها الكبيرة واول ابنائي او بالتعبير الدارج اول فرحتي.

مش عارف هتعامل معاها ازاي في المرحله دي حي طبعا حاليا بقت اقرب لمامها وهي صاحبتها وانا اكني خرجت من الصورة خالص يعني العكس بكل المقاييس عما كان عليه الحال من فترة قريبه جدا جدا

مش عارف هعمل ايه وهتعايش ازاي مع الخلوق الجديد عليه كليا ده والمرحله دي هتودينا لفين؟

شكراً

2009-04-30T10:18:00.002+03:00

ياجماعة بجد بشكر وبعتذر لكل الي سألوا عليه الفترة الي فاتت

فعلا اد ايه الموضوع ده رفع من معنوياتي واسعدني

وبعتذر عن تغيبي الفترة دي لحاجات كتير قوي

بين مشاكل في الشغل بلا حدود

والاوضاع الطين في الخليج حاليا

وحالة اكتئاب حاده جدا

كله مخليني مش قادر على التفكير حتى

ياريت يكون لي نصيب من دعائكم الفترة دي

واكيد هرجع تاني بس ربنا يعدي الفترة دي على خير

مش قادر اشكر ناس بالاسم علشان منساش حد ويزعل مني بس بجد مجرد سؤالكم عني خلاني اشعر بسعاده مفتقدها

تحياتي .

no physical contact

2009-03-29T22:27:00.001+03:00

هو كان المفروض ارد على التاج الي ستوته بعتتهولي بس بصراحه في موضوع اهم قلت انزله الاول وبعدين ادخل على تاج محل

على الرغم من اني قرفان اخر قرف وطالع بظابيظي النهارده وعملت حاجه ولا العيال إلا ان مواقف زعيم الشعب الشومبونجي زادت لدرجه لا تحتمل الاهمال

الاستاذ الفاضل انا مفهمه هو واخواته انه طبعا مفيش حد ليه الحق انه يعاقبه بالضرب لا في المدرسه ولا غيرها

غلطه معلش انا الي استاهل

الباشا عنده المشرفه العامه ست اد جدته كده حاجه بتاعه 60 سنه اي نعم ثقيله وسخيفه بس مش مشكله مش هناسبها يعني

المهم الوليه الكبارة الي قد والدتنا دي غلطت غلطه عمرها ومدت اديها عليه

محدش يسرح بخياله بعيد مضربتوش ولا حاجه دي يا دوب شدته من الجاكت

بس

وقامت القيامه

الظريف في الواد ده تلقائيته وثقته بنفسه

وقف في منتهى التناكه ( والروايه من مدير المردسه شخصيا ) وبصلها من فوق لتحت وقال لها

no physical contact

physical contact is for animals only

طبعا علشان تعرفوا هي اتقالت ازاي جربو تقولوها ولسانكم كله برة

طبعا الوليه الحيزبونه اسقط في يدها ازاي الربع متر ده يرد عليها كده

وعلشان تحفظ ماء وجهها غلطت غلطه كمان

بنت حلال وتستاهل

قالت له طيب افتح الجاكت علشان اشوف انت لابس اليوني فورم ولا لأ

غلط الست؟ اكيد لأ

بس نظراً ان الباشا كان مزاجه اتعكر خلاص فطبعا مش هيعديلها حاجه وهو يموت ويصطاد حد غلطان

بصلها تاني من فوق لتحت وقال لها

sorry اصلك مش من شجرة العيله

والله ما اعرف علاقه شجرة العيله بفتح الجاكت لغايه دلوقتي بس مرضتش اساله بدل ما اطلع انا الي جاهل

بس اعتقد والله اعلم ان فتح الجاكت امام حريم غريبه بقى عيب الايام دي . عموما الله اعلم

الكلام ده كان الصبح اول ما وصلو

الراجل دخل فصله وقال يا فتاح يا عليم ورش قدام الديسك ووضب القعده مدرسته دخلت

مش عارف ايه الهبل الي نزل عليهم النهارده بس برضه لسبب ما راحت شدته من الجاكت

وانا شاكك ان الجاكت هو السبب وهو الي بيستفزهم

نفس الطريحه الي اداها للمشرفه مضروبه في 3 للمدرسه

لانه بعد ما قال التصريح الشهير

no physical contact

اداها درس في انه عنده ودان وبيسمع ومخ وبيفهم

طبعا لكم ان تتخيلوا ان مدير المدرسه بيحكيلي وهو فطسان على روحه من الضحك من الي الباشا عمله في 2 من هيئه التدريس في يوم واحد والظريف ان مدير المدرسه معجب بتصرفه .

طيب لحد كده وهتقولوا جت سليمه ليمه ليمه

ابدا

انا عندي تشكيل عصابي والتشكيل ده في مدرسه واحده

المشرفه صغرت عقلها وقررت تحط الاولاد في دماغها ودي كانت الغلطه القاتله

حد يجي قدام الاتوبيس ويقول يارب

التلاته الي حطوها في دماغهم ودول دماغهم جزم ولا سيما لو اتفقوا على حد

تاني يوم اشتغلت قرف في الولاد فاجتمعوا وقرروا التصرف معها

البدايه

المشرفه دخلت عند سوسا المقروصه في الفصل

- قومي يا سوسا ( دي المشرفه من على الباب)

- لا مش قايمه تعالي قوميني انتي ( دي سوسا المفتريه وعينها تطق تحدي )

الوليهه اخدت بعضها تجر اذيال الخيبه بعد ما شافت في عنين سوسا نظرة الشر الشهيره

راحت على البكريه

- افتحي العبايه علشان اشوف اليوني فورم

- هو انتي موركيش غيري في المدرسه دي؟ انتي بتنزلي الصبح من بيتكم مخصوص علشاني؟ وراحت مشغله الجنونه وعياط وصريخ ولمت الادارة كلها على الوليه الهبله وراحت مدينا ميسد كول على الموبايل ( اشارة الخطر) طرت انا والمدام طبعا لاقيناها قاعده في الادارة ونفس الموقف الي حصل مع عادل امام في شاهد ماشفش حاجه وهم بيحاولوا يخلوة يبطل عياط مع البكريه ومن مدير المدرسه لاصغر موظف بيحايلو فيها ( طيب نجبلك عصير - طيب معلش حقك علينا احنا ) ودي ابدا عاوزة بابا دلوقتي وانا مش هقعد مع الوليه المجنونه دي في مدرسه واحده تاني.

مامتها اخدتها وبتهديها يعني

اتاري بنت اللذينه ده كله تمثيل وبتضحك وبتقول لمامتها لما قالوا لي نجبلك عصير تهدي اعصابك افتكرت اني لسه مفطرتش فكنت هطلب فراخ بانيه وبطاطس محمرة بس قلت بلاش لايطلعوا لا قدر الله بيفهموا!!!!!!!!!

مش بقول لكم تشكيل عصابي

طب هل تفتكروا ان التشكيل يقف عند هذا الحد؟

ابثلوتلي

انضمت اليهم زعيمه التشكيل زوجتي العزيزة وراحت ماسكه مدير المدرسه اخدته فومين غسيل ومكواه طلعته اكثر بياضا وراحت حالفه ميت يامين الولاد ماهم لابسين اليوني فورم تاني خالص ووروني هتعملوا ايه ده طبعا بعد ما سمعتهم المراد من رب العباد اننا بندفع لكم يا غجر مبلغ وقدرة وبالعمله السهله ( بتعايرهم من الاخر)

وانا واقف والله الناس صعبانه عليه انا عمال اراضيهم واقول لها عيب كده يا حببتي ترد وتقول انا ولادي الي يجي ناحيتهم اشرحه كاروهات.

مدير المدرسه قرر فصل القوات واصدر تعليمات فوريه ان افراد العصابه قصدي ابنائي الاعزاء لا يخضعوا لاي سلطه في المدرسه سواه هو شخصيا وانهم حتى لو غلطو ممنوع حد يعاقبهم او حتى يكلمهم وعلى المدرسين ابلاغه هو وهو هيتصرف.

يعني من الاخر انا مودي الولاد المدرسه يتربوا هم الي ربوا المدرسه والمدرسين واخدوني معاهم فوق البيعه.

المهم انهم مُقنعين جدا لما تسالهم عن السبب الي خلاهم يتصرفوا كده تلاقيهم بيباصوا الكلام لبعض ولا فريق البرازيل في اوجه ويقنعوا الجن انهم على حق مبين. وكله كوم وسوسا المقروصه وهيه واقفه بتفكرني بفيلم الداده دودي والبنت راسمه البراءه على وشها وبتفول للمدير كلهم وحشيين وهيه شيخ منصر.

المصيبه السوده بعد كل الي حكيته ده الطبيعي اني اسمع في الولاد درر

ابدا جبنا المدرسين بتوعهم ووالله مش عارف هو الي قالوة خوف من العيال ولا ايه بس الكل قال انهم من افضل الطلاب خلقا وعلما!!!!!!!!

وان الي حصل ده اول مرة يحصل

ياترى ياهل ترى الكلام ده اتقال تحت ضغط وترهيب من الاولاد ولا حقيقه

هذا ماستكشفه لنا الايام القادمه

كان معكم من قسم النزهه

مراسكلم ضايع

حد ياخد مراتي ويجيب بدلها مروحه

2009-03-27T16:19:00.000+03:00

البوست ده هديه لستوته الي بتسنكر اني بانكت عن المتزوجين

وعلى الرغم من مرور سنين على الحادث ده إلا اني اقدر اقول اني وبلا فخر اعيش مثيل له بشكل مستمر

- قوم يا مصري بسرعه

اصحى

الحق الي حصل

- فيه ايه

ده انا طبعا بعد قفزة ثلاثيه من السرير مع استدارة كامله على اطراف الاصابع ولا اجدع غطاس مجاري

- شفت الحادثه الي حصلت

يا نهار ملهوش ملامح على الصبح ( الساعه 7 الصبح ) حادثه يعني يومنا ملهوش ملامح ياتارى مين؟ ومين حصله ايه ومين مع مين طبعا 1000 سؤال مروا في النافوخ بتاع الانا في فمتو ثانيه قبل ما انط بالسؤال التقليدي

- اهدي بس يا روحي وصلي على النبي مين حصله ايه؟

- دي مصيبه دي كارثه ( بكااااااااااااااء كالمطر )

لا دي كده باينها مصيبه بجد ونهار اهلك مطلعتلوش شمس ياواد يا مصري

- يا بنتي بوظتي اعصابي مين حصله ايه

- بس انا كنت متوقعه حاجه زي كده. يعني هم هيسكتوا

اممممممممممممم هو فيه ايه ؟ هو حد كان عيان وانا مش فاكر؟ طيب حد كان عليه تار وانا معرفش ؟

- يا بنتي حرام عليكي قولي فيه ايه

- المفروض هتاخد اجازة النهارده من الشغل

- اكيد مش حادثه وبلاوي مفيش مشكله انا هتصرف في موضوع الشغل متقلقيش بس انطقي حصل ايه

- طيب قوم بس الاول خد نفسك واشرب كبايه شاي وانا هقول لك

- شاي ايه ونفس ايه قطعتي نفس امي يا حببتي بطلي عياط وفهميني

- مصري مش هتصدق

- ياستي ورحمه امواتي هصدق

- هقولك بس ما تتخضش

- مستحيل اتخض اكتر من كده وعموما لو راميه على خلفه تاني ابقى تفي على قبري

يابنتي انطقي طلعتي بظابيظي

- دايانا ماتت يا ضايع

طبيعي اني العب بلاي باك وادور في عائله مراتي الكريمه على مين دايانا
وعلى الرغم انها فقدت الامل في اني احفظ اسامي عائلتها الكريمه مش بسبب ضعف الذاكرة عندي ولكن سبب العدد المهول الذي يتعدى امكانيات الذاكرة البشريه الي المفروض احفظة إلا اني حاولت

وعبثا احاول معتقدش اني قابلت عندهم حد اسمه دايانا خالص
قلت اكيد واحده صاحبتها وانا مش عاوز اجرح محاسيسها واسألها دايانا مين
برضيك عبثا احاول انا عارف صاحباتها كلهم مفيهومش دايانا خالص

يانهار طيب تبقى تبعي انا

انا؟ ازاي انا معنديش حد لا في العائله ولا في اصحابي اسمها ديانا برضه

يادي النيله مبدهاش اسأل بقى وامرك لله

- دايانا مين يا حببتي؟

نظرة استعراب ممزوجه باندهاش وبها خليط من الاستنكار وعدم التصديق

- دايانا !!!! مش عارف دايانا

- ياستي بس لسه صاحي ونافوخي مش مجمع كويس دايانا مين؟

- الاميرة دايانا

ونزلت علي الكلمه وسكت ( اكيد مش حزن عليها يا سيدي )

- الاميرة دايانا مين ؟( ده انا بعد دقيقه حداد على عقلي الي مات اثر حادث اليم )

- الاميرة دايانا مرات الندل شارلز وحبيبه دودي الفايد

ده انا فكرت كده فعلا صح وده مش هزار دي بتتكلم بجد وهي دي المقصوده

في هاذوة اللحظة كان عندي مجموعه بدائل بافاضل بينها

ياترى ارميها من الشباك؟ احنا في الدور التاني مش هيحصل لها حاجه

اولع فيها ؟ معنديش بنزين في البيت

ماهو مش ههدى غير لما اعمل فيها كارثه قوميه

يعني انا اتنطر من على سريري بالشكل المأساوي دة ويتم ايقاظي بالطريقه دي واسكت

لا مونكن ابدا

بختها الطين اننا كنا بايتين عند حمايا العزيز

فرصه الانتقام يا بنت سلطح بابا

وهنا انطلقت بصوتي الجاهوري

يا عالم يا هو حد ياخد مراتي ويجيب ربع جنيه مخروم

حمايا طبعا جه زي الصاروخ وراه حماتي واخوات المدام

- فيه ايه ايه الي حصل

- فيه ايه ؟ اسمحلي اقول لك ومتزعلش مني انك مخلف مختله عقليا وكان لازم تحطها في مستشفى الامراض العقليه من زمان

- ليه يابني تف من بقك ( دي حماتي طبعا )

- طيب انا مجنون وانتو عقلاء اسمعو وعوا وحد يقولي اعمل فيها ايه

وحكيت القصه بمنتهى الامانه العلميه ( وطبعا انا باحكي ومراتي شغاله نهنه زي ماهيه بس مش عارف هل علشان المرحومة ولا علشان الفضيحه الي عملتهلها.

بعد ما خلصت حمايا رمى زوجتى الجبيبه بنظرة بصراحه لوحدها اشفت غليلي الي هي كانت ياعني حاجه من بين يا بنت المجنونه الى لله يفضحك زي ما دايما مجرساني حاجه كده ظريفه جدا

حماتي طبعا حبت تلطف الجو فقالت لمراتي

-خلاص يا شوشو بتعيطي ليه ده ضايع بيهزر ومش زعلان ولا حاجه

والنبي انتي طيبه يا حاجه لا انا زعلان بقى وعاوز اولع فيها بجاز

تفتكرو رد مراتي ايه؟

- انا عارفه ان ضايع بيهزر وده انيل لانه مش حاسس بيه وبالحزن الي انا فيه

ثم قال لها مفيش فايده يا صفيه غطيني وصوتي

افرفشكم شويه

2009-03-25T13:11:00.004+03:00

مش عارف حاسس ان فيه موجه اكتئاب عامه عند الناس الي بقرأ لهم ومش عارف هل ده اكتئاب الربيع زي ما هاني قال في نط في الكوز ولا دي حاله قرف عامه؟

عموما انا اصلا مليش مزاج اكتب اي حاجه وعندي برضيك حاله قرف وتهييس قويه جدا ففكرت طويلا تعمل ايه يا واد يا ضايع تعمل ايه يا واد يا ضايع قلت نحاول نخرج من الحاله الطين دي ونفرفش شوية

عملت تجربه في ستوته امبارح ونفعت قلت اشطه نعممها

فقلت اديها شويه نكت عن المتزوجين وربونا يستر

خدو عندكم

- سودانيه لبست قميص نوم أحمر وقالت لزوجها دلعني قلها الزوج : يافحم يامولع

- مره واحد بيقول لمراته تعرفنى انى بحب فتراك اوى راحت مراته قالتله وانا بحب سمير اوى قلها يا ويله فتراك دى مربه قالتلو وسمير ده عسل

- مرة ولد صغير بيقول لمامتة هو الرجل دة بيبوس اختى ليش قالتلة امة علشان هايتزوجها قالها الولد طب بابا هايتزوج الشغالة امتى

- مرة واحد سئل ابوة هو صحيح الحب اعمى .!! قالة ابوة شوف امك وانت تعرف

- قال شخص لزوجته: قولي للأولاد أن يناموا فقالت الام: للاولاد من ينام أولا أعطيه جنيه فنام الأب

- واحد زوجته تريد تسافر بريطانيا وقالت الزوجة للزوج :- إيش تريد أجيبلك من بريطانيا قالها بنت بريطانية وبعد ما رجعت قال الزوج لزوجته :- وين البنت ؟ قالت :- بتجي بعد 9 شهور

- عريس عصبي يوم فرحه كتب في بطاقة الدعوة: الزفت اللي هايجي ميتأخرش...واللي مش جاي في ستين داهية ... والعيال الرذلين الصغيرين يتخمدوا فى البيت..... و اللي هاتجيب موبايل كاميرا هفقع لها عينيها الاتنين....وابقوا اطفحوا في بيوتكم .. كفايه اللي دفعته للموكوسه العروسه.... اللي هتمد ايدها عالتورته هقطعهالها ..وابقى حلي في البيت ياختي انتى وهى .. منتو زي القطط تاكلوا وتنكروا .... الرقص ممنوع .. الضحك بصوت ومن غير صوت ممنوع...... وابقى عيل لو اتجوزت تانى

- مرة واحد ضاع حماره رجع قال لمرته:الحقي الحمار ضاع قالتله:ولا يهمك دخلتك علينا بتسوى100حمار

- مرة دكتور دخل عنبر فى سراية المجانين لقى واحد بيضرب نفسة بالشبشب سأل الممرضة ماله ده ؟ قالت أصله كان بيحب واحدة ومتجوزهاش ..دخل العنبر الى بعده لقى واحد بيخبط دماغة فى الحيطة قالها وده ماله قالتله اصل ده الى اتجوزها

- واحده بتقول لجوزها: تعالى ودينى المستشفى .. ماما هناك وعندها حالة تسمم ... راح جوزها رادد عليها : لازم عضت لسانها بالغلط ؟؟

- واحد جدته عيانة و رافضه الاكل فسألها تاكلى مهلبية والا اجوزك.. قالت له لأ يابنى المهلبية ناشفة على سنانى

- واحد و هو بيموت بص لمراته بصه كلها رومانسيه و قالها : انا لما اترفدت كنتي معايا ، و لما عييت وقفتي جنبي، ولما فلست برضوا كنتي معايا ، و دلوقتى لسا جنبي ، مسك ايدها بحنيه و قالها : مش عاريف ليه حاسيس انك نحس

- مرة واحد بعد سنة من زواجة صحى الصبح وقال لمراتة صباح الخير يا انسة قالتلة ,ماهو من خيبتك يا منيل

- اتصل واحد على زوجته وقال ليها "انا ربحت مليون دولار جهزي شنطتك بسرعة" فقالت الزوجة" طيب احمل معاي ثياب صيف أو شتاء؟" فرد عليها"احملي كل اللي عندك المهم مش عاوزك تكوني في البيت لما أرجع

- فيه حوطيه تبي تفرح زوجها في اول ليله زواجها قالت: انا حامل

- واحد غبي دخل على زوجته ليلة الدخله لقاها مستحيه قال: الحرمه اول مره تتزوج

- صيدلانية اتصلت بزوجها سالتو بتحب الفاصولية حب ولا تحاميل

- واحد تعبان قوي بيقول لمراته ما تقومي تذبحي لنا الأرنب ده . ردت عليه وقالتله علي ايه ياموكوس .قالها علي ملوخية.

- واحد صعيدي ركب تاكسي قعد مراته جنب السواق علشان ميبصلهاش في المرايه

- واحد قاعد في أمان الله بيقرا الجرنان، وفجأة جت مراته وضربته بغطا >>الحلة فوق دماغه .. طرررررخ!!! الزوج: "فيه ايه يا بنت الحلال؟ ليه كدا؟؟؟" الزوجه:"ايه الورقه اللي في جيب بدلتك ومكتوب عليها "سوسو"؟؟" الزوج: "يا بنت الحلال، ده أسم الحصان اللى بنشجعه في السباق!" الزوجه صدقته وراحت لحالها... بعد اسبوع، الزوج قاعد في أمان الله يقرا الجرنان، وفجأة جت مراته وضربته بغطا الحلة على راسه !! الزوج: "خير يابنت الحلال في ايه تاني؟؟" الزوجه:"حصانك على التليفون

- نساء العالم اتحدن وقررن ان لا يقومو باى اعمال فى المنزل وبعد اسبوع >>تجمعو ليعرفوا النتائج الأضراب>>>>فقالت الزوجة الفرنسية "انا قلت لجوزى ميشيل انا مش هعمل حاجة فى البيت الاسبوع دة كلة" وقالت "اول يوم ماشوفتش حاجة، تانى يوم ماشوفتش حاجة، تالت يوم بدا يغسل ويمسح" وقالى "انتى بتتعبى اوى يا حبيبتى".>>وقالت الزوجة الانجليزية "انا قلت لجوزى انا مش هعمل حاجة خالص فى البيت الاسبوع دة"، اول يوم مشوفتش حاجة، تانى يوم بدا يعمل الاكل تالت يوم عشانى وغدانى برة.">>جت المصرية وقالت "انا قلت لابو العيال انا مش هعمل حاجة فى البيت الاسبوع دة" وقالت "اول يوم ماشوفتش حاجة، تانى يوم ماشوفتش حاجة تالت يوم بدات اشوف شوية بعينى الشمال."

- مرة واحدة قالت لجوزها "إهدى حبيبى كدة وأرجع زى زمان"، الراجل طلقها

-مره واحده بتقول لجوزها "تصدق إن أنا كل يوم بحلم بيوم جوازنا" قالها >>"هى لسه الكوابيس دى بتجيلك؟

- مرة حماة أرادت اختباره اجواز بناتها، فاخذت الأول وعملت نفسها اتزحلقت في البحر فنزل وراها وانقذها، تانى يوم وجد عربية بيجو ومكتوب عليها "هدية من حماتك" وفعلت نفس الشئ مع الثانى فاحضر لها الاسعاف ووجد فى تانى يوم عربية بيجو ونفس الرسالة، أما الثالث فسبها تغرق، >>ففى اليوم التالى وجد عربية مرسيدس ومكتوب عليها "هدية من حماك

- واحد متجوز وقاعد في البيت وبيبص كتير في عقد الزواج، مراته قالت له: "بتبص في عقد الزواج ليه يا حبيبي؟" قالها: "مش عارف يا حياتي المأذون كتب تاريخ انتهاء العقد فين

- واحد نشر في إعلانات مبوبة :مطلوب زوجة!!! تاني يوم جاله 100 جواب فيهم نفس الرد: تاخد بتاعتي؟؟

- واحد بيقول لمراته ... انا النهاردة عايز رومانسية فى البيت ... راحت الزوجة سألت امها : يعنى ايه رومانسية ؟؟ الام : مش عارفة بس احتياطى إنقعى الرز

- مرة اتنين لسة متجوزين جديد وخرجين ومشين على الكورنيش الزوج:شايفة القمر يا قمرايا الزوجة :شايف النيل يا منيل

عارف اني هتقطع النهاره لكن ولا يهمني

رداله ولاد رداله ومعندناش Feminine side كمان

هختارها هيه

2009-03-22T14:43:00.005+03:00

منين اجيب حب اقدمة ليك

ولا اجيب كلام يوصفه ليك

حوليه كل الناس وبدور عليك

ومن بين كل الدنيا بتوحشني عنيك

لو كنت اعرف اشرح او انظم الكلمات

كنت شبكتلك حروفها باعذب النغمات

وعملت لك قصه يقولوها في الحكايات

قصه حب مقدرتش توصفة الكلمات

قصتي معاكي ما ليها بداية ونهايه

قصه حبي ليكي بتحكي اجمل حكايه

رسمت حروفها شفايف طارحه 100 وردة

ومزينها رقه ملهاش مثيل الزمن ده

لو يوم قالولي اوصفك راح اقول حورية

ولو قالوا شقاوتك راح اقول جنية

ولو قالوا كيانك راح قول حنية

ولو عرضوا عليا الدنيا اقول دنيتي هيه

ست الحبايب يا حبيبة

2009-03-21T16:12:00.003+03:00

النهارده لازم اعمل حاجه بتاعه 100 تليفون

اصلي محظوظ بكم رائع من الامهات

ولازمن ولا بعد اقول لكل واحده منهم كل سنه وهي تملاء حياتي برضاها ودعائها لي

ولكن هناك امي الجميله

التي لن تكفي كلمات ان تكون جملة واحده توفي لها اقل من قدرها

ولن اتمكن من صياغه جملة اهنئها فيها بعد الام

ولكن يكفي انها تعرف انها اعظم ام في هذه الحياة

واحن ام

امرأة صنعت رجالا ونساءاً تطاول رقابهم عنان السماء

امرأة صاغت ببساطتها اسطورة في البذل والجهد

امرأة تأبى إلا ان تحمل هموم ابنائها إلى اليوم على الرغم من عمرها

كل عام وانت في اتم صحة وعافية ورضا عنا

اقبل يدك التي لم تحرميني حنانها يوما

ولم تنسي ان ترفعيها بالدعاء لي يوما

فلا حرمني الله منك ولا من رضاك علي

حماتي وامي الثانيه

امرأة لا يمكن ان اصفها

ام لكل ما تحمله الكلمه من معنى

من اول يوم تزوجت ابنتها ووضعتني في محل ابنها الاكبر

لم تبخل على يوم بنصائحها ولا حنانها

ولن انسى لها مواقفها معي في بدايه حياتي

ولا وقوفها في صفي في كل مشكله بيني وبين زوجتي

هي ام ثانيه حباني الله بها ليزيد فضله وكرمة علي

كل عام وانتي بصحه وعافيه

تملأين علينا جميعا حياتنا املا ومحبه تملكين منها ما يكفي ان يملأ العالم محبه

اختي الغاليه

تخيلوا على الرغم من ان فارق العمر بيني وبينها اقل من عامين إلا انها ابت إلا ان تكون ام منذ نعومة اظفارها

لن استطيع ان اصف حنانها وحبها لاخوتها

ولن اقدر على وصف ما بذلته وتبذله لاخوتها حتى اليوم

الناصحة الامينه

كاتمه السر

السند وقت الشده

هذه هي اختي الحبيبه

والتي تستحق ان اقول لها كل عام وانتي بخير ليس في عيد الام فقط

ولكن كل يوم

دمتي في حياتنا نورا

زوجتي الحبيبه

ام في عطائها بلا حدود ولا قيود ولا شروط

تعرف متى تأخذني في حضنها الدافئ كأم وتربت بيدها الحانيه على كتفي لتزيل عني هموماً وهموم

تعرف كيف تودعني كل يوم بدعاء جميل ليطرح الله البركه في يومي ويعينني علية

تعرف كيف تداعب الطفل الذي بداخلي تقلل من تمردة وتهدئ من روعة

هي زوجتي

وحبيبتي

وامي

وصديقتي

وكل دنيتي

كل عام وانت حبيبتي

كل عام وانت في قلبي وحياتي

كل عام وانت اجمل من سابقه

كـــــــــــــــــــــــــل عـــــــــــــــــــــــــــام وكــــــــــــــــــــــــــل ام طيبـــــــــــــــــــــــه

ذهب وفالصو

2009-03-20T15:34:00.000+03:00

تضع الحياة دوماً علاقاتنا الانسانية في مواضع الاختبار لتتحقق من العلاقات الاصيلة والعلاقات الزائفة.

ولم تستثني الحياة من هذه الاختبارات اي من العلاقات الانسانية على الاطلاق حتى ما نطلق عليه علاقات اصيلة الطبع مثل علاقه الامومة والابوة والاخوة.

لكن تظل دوماً اكثر العلاقات الانسانية مروراً بهذه الاختبارات والفشل فيها هي علاقة الصداقة.

فعلى الرغم من السمو اللفظي والمعنوي لهذه العلاقة إلا انها من اكثر العلاقات الانسانية فشلا في مواجهة اختبارات الحياة مرات ومرات لتُظهر الاصيل والزائف في هذه العلاقات, فتارة تصفعنا بيد ثقيلة لنحرك جفوناً اثقلتها الثقة وانعستها الطمئنينة لنرى وجوهاً شاحبة غير التي عهدناها وقد وُصمت بخاتم الزيف.

واحياناً قلة نجد يد ممدودة إلينا لنتكئ عليها في خضم هذه الاختبارات لتؤكد لنا على اصالة الرابط وعمق الصلة.

وعلى الرغم من أني قابلت في مشواري في هذه الحياة آلاف وتعرفت على المئات وأعتقدت أن اصدقائي بالعشرات إلا اني كنت دوماُ اُصدم من نتائج هذه الاختبارات.

ويمحو الزمان اسماء واسماء من لائحة الاصدقاء كل يوم ونجد أن البوم صور الاصدقاء يتقلص يوماً بعد يوم حتى اصبحنا نخشى ان يتلاشى يوماً ما.

وتختلف قوة الصفعة على قدر ما كنا نؤملة في الصديق, وما اقساها من صفعة حين تأتي مقترنة بوصم من وضعناهم محل ثقتنا وتهنا بصداقته فتزلزل الصفعة كياننا حين تُفيقنا وتوصمة بوصمة الزيف.

وعلى الرغم من زعمنا باننا نزداد كل يوم حكمة وحنكة إلا اننا نعترف امام نتائج هذه الاختبارات كل مرة اننا لانزال عرضه للخداع ولم تُكسبنا الحياة والعمر الطويل سوى قليل من المعرفة والتي لم تكن كافية للامان من الوقوع ضحية الصديق الزائف.

هناك علاقات متنافية كما الاحداث تماماً فوقوع احدهما ينفي وجود الآخر وحذار يا هذا ان تسوقك قدماك إلى محاولة السير على الحبل ممتطياً ذكائك في التارجح مابين اليمين واليسار جنحت مرة إلى مستنقع استنكر على أنفي تحملها لرائحته الكريهة ولهول مالاقيت بداخله الا ان اكثر ما صدمني بعد ان نفضت آخر علقة علقت منه على ثيابي هو منظر صديقي الذي كان يمدني بالقوة للغوص في هذا المستنقع

جنحت مرة إلى مستنقع استنكر الآن على أنفي تحملها لرائحته أنذاك

رغم ان ماقالوه الأقدمون حول الصديق الذي يصدقك

ذهبت كل معالم صداقتي وثقتي به في ان ينبهني إلى هول ما انوي الدخول فيه

لم اجد عيناه تستنكر ماأقدم عليه لم اجد يداه تمتد لكي توقفني عند هذا الحد من التنازل ماوجدت غير حِمل رمل ساعدني في ربطه حول ساقاي كي تثبت قدماي في كل خطوة اخطوها في هذا المستنقع

لا انكر على نفسي توهمي حينها بانه لا توجد أية أضرار قد تلحق بعلاقات اخرى

لا اخفي شعوراً بالانتقاص يتراقص حول صورتي حين اطالعها يوميا في المرآة

لا ألوم صديقي وحده فيما حدث ولكني أسأله ألم ترى الـ ..... في نهاية السبيل ؟

ومع فقداني صديق وضعت في صداقته ثقة كبيرة وعهوداً غليظة فما كان منه إلا ان قابل هذه الثقة بخسة الافاعي ونذالة قطاع الطرق ولم يتورع ان يرميني بما يعرف يقينا انه ليس في ليبرر لنفسة المريضه خطأه في حقي.

واجد نفسي اتسائل

اي الاثنين الباقين - من العشرات - سافقد لاحقاً؟

واهمس بيني وبين نفسي:

ظلو اصدقائي..........

لندن الدور الثاني

2009-03-16T11:05:00.005+03:00

ده باختصار عناوني الحالي لاي مراسلات

العائلة الكريمة تقريبا اتفقوا على انهم يجننوني

يعني مش كفاية عليا زعيم الشعب الشومبونجي

لا المدام كمان فضيت لي

قررت انها تسيب الشغل وتتفرغ ليه

ليه؟ هو انا اشتكيت

والله ما حصل

المهم اللهم انا لانسألك رد القضاء ولكن نسألك اللطف فيه

ظريف انك تكون متجوز من واحدة مثقفه وكلاس واستايل

ده جميل في مجمله وعلى الاقل هتعرف ان الاولاد هيتربو كويس

بس هتدفع التمن يا داميل

وخصوصا من الي هتعانيه معاها

الحكايه بدأت تزيد وآخد بالي منها من بضع شهور

من بدايه الارتداد لمرحلة المراهقة لزوجتي الحبيبه

اه هي طول عمرها بتتكلم فرانكو اراب

بس دلوقتي بقت بتتكلم فرانكو الفرانكو بس

الاراب مات في حادث اليم معاها

ماهياش ازمة مانت يا واد يا ضايع مش ضايع في العنجليزي برضه وماشي حالك

ده الي كنت فاكرة

هحكي 3 مواقف بس هتحسو فيهم بالي اقصده

الموقف الاول

كنت بالكم صديقه على الماسنجر

عادي يعني مش ازمة وعندي على الماسنجر حاجه بتاع 300 صديق وصديقه

وكل يوم بليل بقعد ساعه تقريبا ارغي معاهم

المهم كنت باكلمها وجائت فراشتي الجميله تتهادى حامله كوبين من الاميريكان كوفي

وجلست جانبي

- بتكلم مين يا حبيبي

- بكلم فلانه

- ايه ده انت بتكلم دي؟

- يعني ايه دي ؟

- ايه ده انت ازاي تكلم واحده low life

انا الكلمه ضربت في النوفوخ وقلت يا واد يا مصري الكلمه دي عدت عليك فين؟ هل اخدتها في تانيه ولا تالته؟

المهم قعدت اقلب في الجمجمه وفي كل المصطلحات الي عدت عليه بدايه من السعيديه إلى الدليل الفني لشبكات سيسكو ملقتش المصطلح ده عدى عليه خالص

مش عارف ليه ساعتها معرفتش اتقمص اي شخصيه غير شخصية اللمبي في الي بالي بالك والمزيعه بتسأله وهو بيبص لها وبيهز دماغه وبيقول لها

- ايوة نعم حضرتك

- ايه يا بيبي ازاي تنزل بمستواك انك تكلم واحده low life زي دي؟

- ايوة معلش علشان بس اعرف اجاوبك ممكن سؤال ولو مفيهاش اباحه؟

- يعني ايه low life دي من غير فضايح

- low life يعني low life افهمهالك ازاي دي ؟ معقوله مش عارف يعني ايه low life؟

- لا وحياه مماتي وبباتي معدت عليه في اي منهج

- low life يعني كده زي ما تقول مثلا انها low life

- اه كده فهمت مش تقولي من الاول كده

- لا low life يعني تحت قوي يا بيبي حاجه كده وحشه خالص

- بيئه يعني؟

- ايه بيئه دي انت هتبوظلي العيال

- ايه ياستي هو انا قلت كلمه ابيحه؟

- اه ايه بيئه دي ؟ دي كلمه ميقولهاش غير واحد low life

يا دين امي

يامصبر الوحش عالجحش يارب

مش عارف ليه كنت عاوز في اللحظة دي اديها بوكس في مناخيرها

هنا تحديدا تراقص في عقلي مشهد يوسف وهبي وهو بيقول اهي صوتت بالبلدي بنت صلطح بابا

المهم خلص الموقف ده وخلاص

مفيش بعدها ب 10 دقائق لاقيت ثلاثي اضواء المسرح ومعهم واحد نص متر لسه داخلين هجوم على غرفتي المسكينه بشكل يخليك تقول

الطف بنا يا لطيف

انا هعترف لوحدي ومحدش يمد ايده

ابتدرت آنستي لولو الكلام لتبرير الهجمه المرعبه

- بابا تخيل فيه ولد قليل الادب جدا في المدرسه عندا

- ليه يا حببتي عمل ايه

- قال ال F word وهو بيتخانق مع واحد

- مين ؟ قال ايه يا حببتي

- ال F word يا بابا تخيل

ايه يا ددعان هو احنا بقينا قدام اوي كده؟ هو ال F بقت شاتومه وانا معرفش

طبعا حببتي قاعده جنبي حست بحوستي فبصت ليه وعلى وجهها ابتسامه علشان متحرجنيش قدام الولاد

- الكلمه العيب يا حبيبي

زي مانا حمار جملتها متمكنتش انها تحولني من حمار لجحش حتى

هنا رأى زعيم الشعب الشومبونجي حيرتي فحب ان يحسم الموقف علشان منضيعش وقت

- ايه يا بابا الكلمه الي هيه F U C K

شوفتو الادب

مرضيش يقولها انما قالي الاسبلنج مش مامته قائد طابيه؟

هو يوم مزفلط من اوله هيقف دلوقتي ليه

بتقول ايه يا حبيبي؟

جبت الكلمه دي منين؟

طيب هنا وقفه وعاوز اراء الساده المستمعين

هل انا سألت سؤال ابيح؟

او هل هو سؤال غبي زي ليه الشمس بتطلع الصبح مثلا؟

امال ايه سبب نظرات القرف والازبهلال الي قابلتني من الجميع بعد هذا السؤال؟

و 5 في صوت واحد

انت آخر مرة اتفرجت على فيلم اجنبي كان امتى؟

اه انا فعلا غبي ومتأخر

- هم دول يا حببتي الي هبوظهم بكلمه بيئه؟

نظرة تحذيريه من المدمرة الامريكيه يو اس اس مراتي

خلاص ما علينا

- طيب يا حبايبي طالما انه ولد قليل الادب كده يبقى خلاص ملكوش دعوة بيه خالص لانكم مبتصاحبوش غير الناس المحترمه الي زيكم

- ايه ده يا بابا انت فاكرة صاحبي؟ لا طبعا ده بس معانا في المدرسه لكن كده او كده مش ممكن اصاحبه ده low life خالص

ثم قال لها مفيش فايده يا صفيه غطيني وصوتي

الموقف الثاني

انا من عشاق سهير زكي

محدش يفهمني غلط

بحب الرقص الشرقي جدا طول عمري

عادي يعني فن ياجماعه

وبعدين سهير طول عمرها راقصه محترمه

المهم

جالس انا وحرمي المصونه والجوهرة المكنونه بنتفرج على وصله رقص لسهير

عادي جدا

- حلوة قوي واحلى حاجه عندها ال Abdominal muscles بتتحكم فيها حلو قوي؟

- Abdominal muscles ؟ ده رقص يا حببتي

- ايوة ماهو معتمد في المقام الاول على ال Abdominal muscles حتى اسال فلانه هي مش رقاصه؟

- انا هسال رقاصه واقول لها ال Abdominal muscles؟ علشان تفتكرني باشتمها وتشبشب لاهلي

- ليه هي مش تعرف يعني ايه Abdominal muscles؟

- لا يا حببتي تعرف بروبروء على رأي منى زكي

حسبي الله ونعم الوكيل فيك يا فخري

الموقف الثالث

- بتكلمي مين على الماسنجر يا روحي؟

- ده فلان يا حبيبي

- هو فين الجزمة ده انا مشفتوش من كام يوم هاتيه علشان اكلمه

- لا استنى علشان بنتناقش في موضوع مهم وكمان فيه بنوته شغلاه وشكله هيدخل القفص قريب

- طيب قدامك كتير

- لا علطول

اتغديت وشربت الشاي وفردت شويه على السرير

مش كتير

ساعتين

- ايه يا ماما بترغو في ايه؟

- يووووووووة يا بيبي حاجات كتير اصل فلان ده اكتر واحد باعرف اتكلم معاه بعد فلانه انتيمي

- ليه يعني؟

- اصله عنده تواصل حلو قوي مع ال Feminine side بتاعه فبيعرف يفهمني ده حتى رأي فلانه وفلانه كلنا بنعتبره افضل صديق

- استني بس عنده تواصل مع مين ؟

- مش مين عنده تواصل مع ال Feminine side بتاعه

- هو عنده Feminine side؟ انا اخر مرة شفته كان راجل

- ماهي دي مشكلتي الوحيده معاك.

- ايه هيه معلش علشان افهم

- انت معندكش اي تواصل مع ال Feminine side بتاعك

- ايه ده هي وصلت نغلط في بعض. احترمي نفسك يا هانم. Feminine side ايه الي هيبقى عندي. انا راجل قوي

- اوف يارب هفهمه دي ازاي؟

- تفهميني ايه؟

- يا بيبي كل واحد جواه Feminine side وكمان Childish side

- بصي من الاخر يتقال عليه عيل ماشي ممكن اعديها لكن ست ؟ دي كلمه تطير فيها رقاب. ده احنا رجاله قوي قوي لامؤاخذه

- ملهاش علاقه يا حبيبي بانك عيل او ست ده الجانب الي بيخليك تقدر تحس بشعور الانثى وتفهما وتحس بشعور الطفل وتفهمه؟

- دي نظريه مين بالصلاة عالنبي. يعني علشان افهمك لازم يكون عندي Feminine side ليه انشاء الله ما انا بفهمك وبحس بيكي وكل حاجه ومعنديش الهباب ده

- اه انت بتفهمنى بس مش زي فلان هو بيحس بالي عاوزة اقوله من قبل ما اقول بمجرد ما احكي الموقف

- بقول لك ايه متخلينيش اطلع ال Masculine side على جتتك النهارده. انا كده وهعيش كده وهموت راجل بأذنك يا رب برضه

آل Feminine side آل

اللهم فك كرب المسلمين

2009-03-13T14:56:00.001+03:00

السلام عليكم ورحمة الله وبركاته
يوم نام ابراهيم ابن الرسول عليه الصلاة والسلام في حضن أمه مارية وكان عمره ستة عشر شهراً والموت يرفرف بأجنحته عليه والرسول عليه الصلاة والسلام ينظر إليه ويقول له :
يا إبراهيم أنا لا أملك لك من الله شيئاً ..
ومات إبراهيم وهو آخر أولاده فحمله الأب الرحيم ووضعهُ تحت أطباق التراب وقال له :
يا إبراهيم إذا جاءتك الملائكة فقل لهم الله ربي ورسول الله أبي والإسلام ديني ..
فنظر الرسول عليه الصلاة والسلام خلفهُ فسمع عمر بن الخطاب رضي الله عنه يُنهنه بقلب صديع فقال له :
ما يبكيك يا عمر ؟
فقال عمر رضي الله عنه يا رسول الله :
إبنك لم يبلغ الحلم ولم يجر عليه القلم وليس في حاجة إلى تلقين فماذا يفعل ابن الخطاب!
وقد بلغ الحلم وجرى عليه القلم ولا يجد ملقناً مثلك يا رسول الله !
وإذا بالإجابة تنزل من رب العالمين جل جلاله بقوله تعالى رداً على سؤال عمر:

}يثبت الله الذين آمنوا بالقول الثابت في الحياة الدنيا والآخرة ويُضلُّ الله الظالمين ويفعل الله ما يشاء {

نسأل الله تعالى أن يثبتنا عند سؤال الملكين
ويهون علينا وحده القبر ووحشته
ويغفر لنا ويرحمنا انه على ما يشاء قدير
وآخر دعوانا أن الحمد لله رب العالمين
وصلى اللهم وسلم وبارك عليك يا سيدي يا رسول الله
دعاء فك الكرب

لا اله الا الله الحليم الكريم لا اله الا الله العلى العظيم
لا اله الا الله رب السماوات السبع ورب العرش العظيم

أحد السلف كان أقرع الرأس أبرص البدن أعمى العينين مشلول القدمين واليدين
وكان يقول: 'الحمد لله الذي عافاني مما ابتلى به كثيراً ممن خلق، وفضلني تفضيلاً'.
فمر به رجل فقال له: مما عافاك؟
أعمى وأبرص وأقرع ومشلول فمما عافاك؟
فقال: ويحك يا رجل؛ جعل لي لساناً ذاكراً،
وقلباً شاكراً، وبدناً على البلاء صابراً،
اللهم ما أصبح بي من نعمه أو بأحد من خلقك فمنك وحدك لا شريك لك، فلك الحمد ولك الشكـر

قال تعالى: {وَمَن يَعْشُ عَن ذِكْرِ اْلرَّحْمَنِ نُقَيِّضْ لَهُ شَيْطَاناً فَهُوَ لًهُ قَرِينٌ} الزخرف 36 ..

( لا إله إلا أنت سبحانك إني كنت من الظالمين)
لم يدعُ بها مسلم في شيء إلا قد استجاب الله له ..
كلمات قد يلين بها قلب صلد وعين تحجر الدمع بها
نسالكم الدعاء بظاهر الغيب

خلع عل هوا

2009-03-11T17:52:00.001+03:00

كلنا سمعنا كتير عن اتنين يتعرفوا على النت ويحبوا بعض برضه على النت ويتجوزا

بس مش على النت

لكن الجديد الي جايبهولكو النهارده

____

طلاق على النت

____

امبارح كان عيد ميلاد العزيزة مذكرات

ونظراً ان كل المجموعة مشتته في مختلف بلاد الله

قررنا اننا نتلم كلنا على الماسنجر ونعمل لها عيد ميلاد على الهوا

_____

المهم عيد الميلاد انقلب بقدرة قادر

لخطوبه

ثم

تشريد

ثم

طلاق

_____

انا كنت هعمل سرد للاحداث لكن لاقيت الاحسن اني انقل لكم الحوار زي ما هو مع التعليق على الاحداث

في البدايه اسمحوا لي ان اعرفكم بابطال القصة

_______

واحد = العريس" المخلوع "

مشمش = ماريانا " العروس "

Timothy Odysseus = تامر او رحيل " واحد بيهدي النفوس " صديق العروسين وخطيب المستقبل

Ahmed = العبد لله

مذكرات = مذكرات كشكول المورق او منى

aooaaa = رشا او كيداهم او كودي " نائب رئيس جمعيه المرأة المتوحشة "

Mervat = زي ما هيه صديقه لكل الي فاتو

_______

[23:39:04] واحد:
ايوة يا مشمشتى
[23:39:18] (s)مشمش(s) says:

مشمشتك فى عينك ده انا هافضحك

دي كانت البدايه بين الحلوين هناء وشرين ابطال قصتنا النهاردة

وهنا بداء واحد في سرد القصة من البداية

[23:39:20] واحد says:
اسمعوا وعووووووووووووا
[23:39:24] واحد says:
النهاردة
[23:39:30] واحد says:
انا اتقدمت لخطوبة ماريانا
[23:39:32] واحد says:
وهي وافقت
[23:39:35] واحد says:
واتفقنا هتهرب
[23:39:36] (s)مشمش(s) says:
محصلش
[23:39:38] واحد says:
وهتعمل يوتيوب
[23:39:44] واحد says:
وتقول انا اسلمت بمزاجي
[23:39:54] واحد says:
وهنروح الجماعة هنقبض 50 الف دولار
[23:39:55] Timothy Odysseus says:
الف الف مبروك يا ماريانا
[23:39:55] (s)مشمش(s) says:
لا والنعمة ما حصل
[23:40:02] واحد says:
طب والمسيح الحي حصل
[23:40:04] (s)مشمش(s) says:

مبروك فى عينك انت كمان

وهنا بدات العروس بخجل سرد اسباب عدم موافقتها

[23:40:23] (s)مشمش(s) says:

يعني اصوم واخد واحد مستعمل؟

وهنا يتدخل الاصدقاء لاقناعها

[23:40:20] Ahmed says:

متخفيش ده استعمال طبيب

[23:40:21] Timothy Odysseus says:

ده استعمال طبيب

[23:40:30] واحد says:

استعمال حريمي

[23:40:54] aooaaa says:

انتي بس توديه يتشد وتعمليله عمرة هتلاقيه رجع زيرو

وهنا احس العريس انها في طريقها للموافقه فبدء في الكلام الجد

[23:41:22] واحد says:
بس عايز اعرف حاجة
[23:41:26] واحد says:
يا مشمش
[23:41:30] واحد says:
في الفرح
[23:41:37] واحد says:
هنعملة في الكنيسة الاول
[23:41:39] واحد says:
ولا الجامع ؟
[23:41:42] واحد says:

عشان تفرق شوية

وهنا كان لابد للبنيه ان تقول رأيها

[23:42:01] (s)مشمش(s) says:

لا فى معبد اليهود اللى فى مصر القديمة

اخ البنت لانت ووافقت طيب لما ادخل بقلب جامد بقى علشان ازنق عمرو دياب واحزم الشاب خالد " ده العريس بيفكر "

[23:43:08] واحد says:

دة انا هوريكي اللى عمرك ما شوفتية

طيب اكيد الي موجودين دول هيفكروا ياترى هيوريها ايه؟

[23:43:25] aooaaa says:

اه هيوريكي الساعه بتنور في الضلمه

[23:43:35] مذكرات:
لا ياكيداهم
[23:43:41] مذكراتsays:

كوتشى اميجو بينور

[23:44:11] aooaaa says:

انت هتبقى اشعال زاتي بعد المدام ما تقوم بالواجب معاك

العريس الروش احس انه اتزنق في مجلس ستات فحب يبرر موقفه

[23:46:10] واحد says:
انا مش بعمل كدة والله عشان نفسي
[23:46:17] واحد says:
بس اهو جهاد من نحية
[23:46:18] Timothy Odysseus says:
كله علشان خاطر مصر

لغايه دلوقتي الموضوع كويس والبنت شكلها ممكن توافق

اذا لازم يدخل حد يهدي النفوس ويديها شويه جاز على بنزين

[00:53:09] Timothy Odysseus says:

وبعدين انا مش هاعرف اتكلم معاكي وجوزك موجود

كلام منطقي جدا

بس ياترى العروسه رأيها ايه؟

[00:53:27] (s)مشمش(s) says:

وحياتك ولا اعرفه

يالهوي؟ بعتيه عند اول منعطف؟

طبعا هنا لازم تبرر هي قالت كده ليه؟

[00:53:41] (s)مشمش(s) says:

راح على بيت الست الوالدة من تانى يوم

ان ان ااااااااااااااااان تيريرم

طبعا هنا الوقت المثالي للاخوة الاعداء يشتغلوا

[00:53:47] Timothy Odysseus says:
هههههههههههههههههههههههههه
[00:53:51] Timothy Odysseus says:
ياعيني يا واحد
[00:53:56] Timothy Odysseus says:
هو انت رجعت مع الفطير
[00:54:02] مذكرات:
هههههههههههههههههههههههه
[00:54:06] Ahmed says:
لا لوحده
[00:54:13] Timothy Odysseus says:
كمان كلوا الفطير ورجعوه

الواد اتفضح يا عيني

هنا ثار العريس لكرامته وقرر ان يضع حداً لهذه المهزلة الادبيه

[01:02:18] واحد says:
معلش
[01:02:20] واحد says:
لحظة بس

[01:02:25] واحد says:
عشان كدة هتقلب بجد
[01:02:28] واحد says:
وهيحصل زعل
[01:02:33] واحد says:
محدش يقول لخطيبتى مشمش غيري
[01:02:41] واحد says:

اسمها الانسة ماريانا

[01:02:50] واحد says:

وبعد شهر ولا اتنين اسمها مدام واحد

لا كده الكلام اتغير يا جماعه والراجل برضه عنده حق

ايه اقوالك يا عروسه

[01:03:10] (s)مشمش(s) says:

ياخلى اتلهىىى بقولك روحتك على بيت الست الوالدة من تانى يوم ولسة بتتكلم

يادي النيله البنيه مصرة تشردله جامد

طبعا كده وبما انه راجل وممالي مركزة يببقى له الحق في الدفاع عن كرامته المذبوحة امامنا

[01:03:33] واحد says:
يعنى نعتبر دة اعتراف ضمنى اننا اتجوزنا
[01:03:37] واحد says: وقضينا يوم كامل سوا

[01:03:41] واحد says:
وروحتينى من تانى يوم
[01:03:46] واحد says:
الكلام دة كبير بقي
[01:03:49] واحد says:

ومحتاج محامي

[01:03:53] واحد says:
و DNA

[01:03:58] واحد says:

وطب شرعي

طبعا فرصه احلى من الاولنيه للاخوة شل وبروجاز للتدخل

[01:03:39] Timothy Odysseus says:

ههههههههههههههههههههههههههه عاجابني اوي ماريانا وهي بترجع لطارواحد ذاكرته

[01:03:51] Ahmed says:

اه وقالت لك يا كته

[01:03:58] Timothy Odysseus says:

لا هي بس ماحبتش تكسر بخاطرك وتروحك من الو ليلة

[01:04:03] Timothy Odysseus says:

وشكلك في الشارع هايبقى مش ولا بد

[01:04:10] Ahmed says:
ههههههههههههه
[01:04:21] Ahmed says:
اصيله يا مشمش
[01:04:22] Timothy Odysseus says:

وممكن تكون صعبت عليها

[01:04:37] (s)مشمش(s) says:
كان هايبقى هوملس من اولها
[01:04:39] مذكرات:
ياحينى
واحد says:
قلتيلي ما تيجي تخلينا اصحاب واخوات احسن وبلاش نقل ادبنا على بعض
[01:04:41] Timothy Odysseus says:
فقالتلك مش هافضحك واسيبك تقولهم اننا اتخانقنا
[01:04:49] واحد says:
وانااحترمت رغبتك وزي ما تقولي ما صدقت بقي
[01:04:57] aooaaa says:

سترتي عليه الاهي يسترك

[01:05:12] (s)مشمش(s) says:

شوفتى وفى الاخر يتنططوا

كده ظاطت على الاخر

[01:05:34] aooaaa says:

الصراحه راحه ياروحي وكله بان

انت يابني اتفضحت فضيحه المطاهر يوم طلوعه على المعاش

[01:05:44] واحد says:

اركني انتى في جنب يا كودي

تركن ايه يابني دول رفعوك مخالف بونش البلديه

[01:06:02] Timothy Odysseus says:
دلوقتي يا واحد
[01:06:10] Timothy Odysseus says:
احنا هنا اسرة مع بطينا
[01:06:16] Timothy Odysseus says:
ومش معقولة يعني هاتتكسف مننا
[01:06:25] Ahmed says:

مدد على الشزلونج

ده تقسيم نهواند على شرف المرحوم

دلوقتي برضه ده راجل ولازم نجيب له حقه ولا ايه؟

[01:06:27] Timothy Odysseus says:
مش معنى ان ماريانا روحتك بيتكم وزي مارحت زي ماجيت
[01:06:46] Timothy Odysseus says:

الا ان القانون كفلك حقك

[01:06:51] Timothy Odysseus says:

واداك من حقك نفقة متعة

[01:07:19] Timothy Odysseus says:
واي محامي بتلتة تعريفة يقدر يجيبلك نفقتك
[01:07:27] Mervat says:

واحد محكة الاسرة الناصية الجاية

لازم مؤثرات صوتيه يا جماعه

[01:07:29] aooaaa says:

ياميله بختك يا مشمش ياختي

[01:07:45] Timothy Odysseus says:

اه يا غلابانة يا اختي

ايوة كده برافو عليكم

يابني قول اي حاجه تبرر موقفك فضحتنا

[01:08:15] واحد says:
اعمل لها اية الساذجة دي
[01:08:33] واحد says:

انا جايب لها 2 كيلو جمبري جامبو ..... راحت المفترية طبخته بزيت كافور

يا فرحتها بيك ده الي قدرت عليه؟

طيب فضايح بفضايح عاوزين التفاصيل بقى

[01:08:42] Timothy Odysseus says:
احكي لنا بصراحة انتي قلتيله ايه
[01:08:45] Ahmed says:
خلاص يا جماعه ربونا امر بالستر وواحد برضه مننا وعلينا
[01:08:48] Timothy Odysseus says:
قبل ماتقفلي باب الشقة وراه
[01:09:04] aooaaa says:
خلاص يا تامر بلاش احراج
[01:09:11] aooaaa says:
قالت له بؤجتك وعلى اريد حلا
[01:09:27] (s)مشمش(s) says:

لا لا احنا عندنا رجالة برضو مش عاوزين فضايح وربنا امر بالستر

[01:09:42] (s)مشمش(s) says:

خلينى انا اللى شارياه للاخر الخاين الغشاش البياع

[01:09:59] (s)مشمش(s) says:

انا قلت استر عليه بس هو غاوى يفضح نفسه

لا بجد كده كتير يا جدعان حد يقول له حاجه

[01:09:28] Timothy Odysseus says:

محكمة الاسرة فاتحالك دراعتها يا واحد

[01:09:47] مذكرات:

القانون الجديد فى صفك

[01:10:06] Timothy Odysseus says:
انت بس روح قدام القاضي وقوله
[01:10:11] Timothy Odysseus says:

اسفة ارفض الطلاق

[01:10:52] Timothy Odysseus says:
خلاص يا جماعة ده مهما كان اعراض ناس برضه
[01:11:05] Timothy Odysseus says:
والراجل ليه عيلة ليها اسمها في اسلوق
[01:11:10] Timothy Odysseus says:

وماينفعش نوقف سوق اخواته

فيك الخير يابو سوسو والله ما جصرت

كده العريس لازم يلم الدور كرامته مفيهاش حته سليمه لسه

[01:12:08] واحد says:

ياللا يا روحي عشان تتخمدي قصدي تنامي

[01:12:14] واحد says:

وراكي شغل الصبح

طيب انت غاوي بقى

[01:12:22] (s)مشمش(s) says:
خمدة تنيمك ما تقومك
[01:12:31] واحد says:

حد يقول كدة لجوزه حبيبة

[01:12:44] Timothy Odysseus says:
جوزه ايه بقى ماكل شيجن انكشفن وبان
[01:13:02] (s)مشمش(s) says:

روح على مامى بتاعتك يالا الفراخ نامت خلاص ما يصحاش غير الديوك

[01:13:19] Timothy Odysseus says:
ماناا قلت كده من الأول يا واحد
[01:13:22] Timothy Odysseus says:

وخفت على سمعتك

كده قرر العريس انه ياخد آخر خطوة ممكنه

[01:14:30] واحد says:

يا مشمش ميصحش كدة

ياترى العروس هترد وهتقول له ايه؟

[01:14:35] (s)مشمش(s) says:

طروق انت طالق يا حياتى

موسيقى انهيار لعمار الشريعي

[01:14:49] Mervat says:
كده في وشه
[01:14:57] Ahmed says:

يا قادرة

[01:15:01] Timothy Odysseus says:
اوبا
[01:15:06] Timothy Odysseus says:

دن دن دن دااااااااااااااااااااااااااااا

[01:15:15] مذكرات:

طاطاطاطاطاطاطاطا ان ان

[01:16:16] Ahmed says:

ليه يا مشمش تعملي فيه كده

[01:16:25] Timothy Odysseus says:
واحد مهما عملت كل حاجة كانت قدامنا
[01:16:30] مذكرات:
قلبى عليك يااااااااااخى من حر قولت ااى
[01:16:33] Timothy Odysseus says:
وماريانا مااكتفتش باربعة شهود عدول
[01:16:38] Timothy Odysseus says:

دي جابت سبعة

كده خلاص تم القضاء على الزبون قصدي العريس بالضربه القاضيه الفنيه

_______________________________

على الرغم من كونة حوار ساخر جدا وهزار إلا اني لا استبعد ان نراة حقيقه في يوم ما قريبا

كان معكم مراسلكم ضايع من قلب الحدث

آسف لرفعي الموضوع مؤقتا حيث اعترض المخلوع على شبابه على ذكر اسمة صراحه فقمت بتغير الاسم ل " واحد "

دي سمعة ناس برضه

Especially to people who are about to get married‏

2009-03-11T12:32:00.003+03:00

وصلني الكلام ده على الايميل وبصراحه مقدرتش امسك نفسي ومحطوش هنا عبرة لمن يعتبر

#CASE 1
Getting married is like going to a restaurant with friends. You order what you want, then when you see what the other fellow has, you wish you had ordered that.

#CASE 2
At the cocktail party, one woman said to another, "Aren't you wearing your wedding ring on the wrong finger??" The other replied, "Yes, I am. I married the wrong man."

#CASE 3
Before a man is married, he is incomplete. Then when he is married, he is finished.

#CASE 4
Marriage is an institution in which a man losses his bachelor's degree and the woman gets her master's status.

#CASE 5
A little boy asked his father, "Daddy, how much does it cost to get married??" And the father replied, "I don't know son, I'm
still paying for it."

#CASE 6
Young son : "Is it true, Dad, I heard that in some parts of Africa, a man doesn't know his wife until he marries her?"
Dad : "That happens in most countries son."

#CASE 7
Then there was a man who said, "I never knew what real happiness was until I got married, and then it was too late."

#CASE 8
A happy marriage is a matter of give and take; the husband gives and the wife takes

#CASE 9
When a newly married man looks happy, we know why. But when a ten-year married man looks happy, we wonder why. Affair ?

#CASE 10
In the first year of marriage, the man speaks and the woman listens. In the second year, the woman speaks and the man listens. In the third year, they both speak and the neighbors listen.

#CASE 11
After a quarrel, a wife said to her husband, "You know, I was a fool when I married you." And the Husband replied, "Yes, dear, but I was in love and didn't notice it."

#CASE 12
A man inserted an 'ad' in the classified : "Wife wanted". The next day, he received hundreds letters. They all said the same thing "You can have mine."

#CASE 13
When a man opens the door of his car for his wife, you can be sure of one thing : either the car is new or his wife is new.

#CASE 14
A woman was telling her friend : "It is I who made my husband a millionaire. "
"And what was he before you married him?" the friend asked. The woman replied, "A Billionaire. "

عيد ميلاد

2009-03-10T21:19:00.004+03:00

البوست ده ليه هدف واحد

اني اقول لصديقه عزيزة جدا على قلبي كل سنه وانت طيبه

اليوم عيد ميلاد المنوفية المثقفه جدا الجميله جدا العطوفه جدا

مذكرات كشكول المورق

واحده من القليلات اللآئي لفتن عيني بذكاء متقد وثقافة عالية

اضافة إلى ادب اصبح عملة نادر هذه الايام

لذا فهي تستحق ان احتفي بعيد ميلادها في بوست خاص لها

فكل عام وانت بالف صحة

وعقل

وسعادة

زعيم الشعب الشومبونجي

2009-03-09T22:41:00.009+03:00

ده بقى مصطفي افندي ابني او في رواية والدته العزيزة " توفي"

عارفين المسطول دون تعاطي؟

اهو ده وصف دقيق وموضوعي جدا ليه

الواد عليه تعليقات بتخلينا كلنا نموت من الضحك وخصوصا لتلقائيته الشديده فيها

هو كان مغرم قوي باعلان موبينيل بتاع الشعب الشومبونجي ومن ساعتها والكلمه في بوقه

بس مع الاضافات الخاصه بيه

يعني من يومين واحنا على العشا اخته الاكبر منه بتطلب اننا نجيب لها ماكينه غزل البنات

حقها واشمعنى هي مش هتطلب انا حاسس ان الجيران هيخبطوا قريبا عليه يطلبوا هم كمان

المهم

راح باصصلي وعنيه برقت وتحمس جدا وقالي

ايوة نجيب ماكينه غزل بنات علشان نعمل بيها بنات

حلاوتك يابو نسمه

السيد توفي 6 سنوات

وعاوز ماكينه يعمل بيها بنات

الطم يا بشر

طيب لما يبقى في الجامعه هيقولي ايه؟

هات الكرديت كارد بتاعك اسحب موزتين من الصراف الالي؟

جيل شبه منحرف لا عارف يتعدل ولا عارف ينحرف

ده مش موقفه الوحيد

في المدرسه هو تيرم وحيد راح مدرسه غير مشتركه " وطبعا اعلن العصيان المدني "

المهم في قسم البنين انا قلت الواد هيخشن شويه ويبقى راجل

بس مبقاش بالضبط راجل

بقى عربجي

كل يوم راجع انا ضربت فلان

اخر التيرم لاقيته بيحكي لاخته انه اتخانق في المدرسه وقلع لهم التي شيرت

يانهار جاز

ده انا وانا في السيعيديه معملتهاش

طبعا تدخلت في الحوار علشان افهم

- ليه يا حبيبي قلعت التيشيرت

- يعني اتخانق وانا لاسه واتحر واعرق؟ " عينيه بتقول ياحمار" بس مكسوف يقولها

الله يخرب بيت ده جيل

طب ليه يا حبيبي ضربته

اصله ضرب محمد صاحب عمر صاحب اسامه صاحب خليل صاحبي

وانت مال اهلك يا ابن تييييييييييييييييت " دي طبعا في سري بدل ما يمد ايده عليه انا كمان "

- وانت مالك يا حبيبي بس ؟ هو عملك انت حاجه؟

- اصلنا لازم لما نهاجم نهاجم مع بعضينا

- فعلا انتوا تشكيل بقى

طبعا السيد توفي راح المدرسه الجديده وكله حزن والم واسى على فراق المدرسه القديمه

ليه

وهي دي عاوزة سؤال

علشان "دندون"

واحد في آخر الصف بيسال

مين دندون دي يا كابتن لطيف

اقولك يا سيدي مانت مش من هنا

دندون دي بنوته لبنانيه حاجه كده تخلي باربي تتوارى خجلا من جمالها ودي كانت صديقته المقربه

هو تقريبا كان مكسوف يقولي انه داخل على جواز
بس مامته لما راحت حفله التخرج بتاعته

ايوة بتاعته ياسيدي ركز

ماهو الباشا لما ربنا كرمه وعينه راحت في المذاكرة عملولوة حفله تخرج من KG2

لا قرات صح مش النظارة الي عاوزة تنظيف

المهم لما السيده الفاضله حرمنا المصون راحت الحفله رجعت بتحكيلي الي حصل وبتوريني الصور

الساده الخريجيين واقفين طابور علشان استلام الشهادات من مديرة المدرسه ودندون ترتيبها بعيد عنه

ساب الصف وزاح الكل

وبكل قلاطه

راح لغايه عندها

لا يا حبيبي موقفش معاها ميبقاش زعيم الشعب الشومبونجي لو عمل كده

شدها من ايديها واخدها هي الي جنبه

والدكر يعترض

ومن هذا المنطلق قررنا اننا ننقله مدرسه غير مشتركه

لاقينا المصائب اكبر

لما اولى ابتدائي كل يوم ضاربله كام واحد

على اعداديه هلاقيه عامل ايه؟

ده غير الي كان بيعمله في المدرسين الرجاله

هو سهون جدا مع المدرسات

بس على الي وراه للمدرسين

مدرس ماده Social بيشرح درس وبيسال اي شعب مشهور بالزراعه

سؤال والله الراجل ما غلط

بس الباشا كان مزاجه مش قد كده

والمدرس غلبان مش واخد باله فاصر انه يساله هو

توفي وبنظرة كلها برأه " الشعب الشومبنوجي "

طبعا المدرس ازبهل شويتين ولما شافني اخر اليوم قعد يشتكي وحاله يصعب على الكافر

طيب هل ده الموقف الوحيد

ابزلوتلي

مدرس العربي غلط غلطه عمرة وانفعل عليه مرة

عادي ياجدعان ده احنا كنا بناخد بالجزمة من المدرسين هو ايه الي حصل

ده الراجل يادوب شفته الفوقانيه طلعت عن التحتانيه اكتر من 2 ملل

طيب عمل ايه الزعيم؟

ساب الفصل وخرج قعد بره في الحوش " هو مش حوش زي الي كنا نعرفه بقى ليه تعريف تاني نشرحه بعدين " حصتين

مامته بتساله ليه يا حبيبي عملت كده

قال لها بكل براءه

كنت بهدي اعصابي

بيهديي اعصابه ابن صلطح بابا

طبعا ده غير البلطجه المنزليه الي اصبحت من سمات بيتنا العامر

من يومين مامته بتدور في اوضه نومه هو واخوة على البيبيرونه بتاعه اخوة الصغير

عادي يعني يا ددعان الست مكفرتش

الباشا كان لسه بينام

فبتساله بكل براءه وبكل وداعه

- مشفتش ببرونه اخوك يا توفي

- خلاص بقى مش لاقينها عاوزين ننام

الست خرجت مكسورة الجناح ومش لاقي لها قطع غيار في السوق

اشوف فيك اسبوع يا توفي يابن ام توفي واكون اجازة علشان اتفرج براحتي

في اجازتنا الاخيرة في مصر

ابن عمه المدام قاعد معانا وحب يهزر معاه

عادي يعني راجل كوبارة وزي والده

وبيهزر الهزار الي توفي مش بيهضمه

فمسك صندل الباشا وبيساله

- انت بتلبس ده في رجلك ولا في ايدك؟

- لا يا ذكي بالبسه في الشارع

المشكله في تلقائيه الرد

حاجه كده زي صباح الخير صباح النور ماخدتش فمتو ثانيه علشان تخرج من فمه الكريم

الحاجه الوحيده الي عاجباني انه لا يقبل المساومه

يعني لا بينافق حد ولا بعمل حاجه علشان حاجه

ولا يعترف تحت ضغط او تهديد

يعني

خلص ال home work ياحبيبي علشان نخرج

مش عاوز اخرج

شفتوا البساطه؟

بحس ان لسان حاله يقول

انت هتقرفني على خروجه ياعم بالاها

مامته

انت مش بتحب ماما يا حبيبي ؟ طب شيل حاجتك في مكانها

اه بحبك بس انتي بتطلبي طلبات غريبه

علاقيلي هدومي اشمعنى بابا بتعلقي بدله لما يرجع من الشغل؟

يا فسل هتساوي نفسك بيه؟

وطبعا بمناسبه البدل لازم كل بدله اجيبها اجيب لسموة نفس اللون

ولازم الجزمة الرسمي زي بتاعتي بالضبط

ولازم كل يوم وهو بيلبس الجزمة يلبسها باللبيسه بتاعتي الي هي طوله اصلا
كده تعرفتم من عائلتي المتواضعه على المراهقه والشومبونجي ونانوسو

الحلقه القادمه

سوسا الشهيرة بليفي كوهين سفيرتنا في اسرائيل مستقبلا فور تمامها 10 سنوات

وتوقعوا استرداد فلسطين على يدها واحتمال مصر تطالب على يدها ايضا بحقها التاريخي في ولايه كاليفورنيا

كاذبون

2009-03-08T17:15:00.006+03:00

فاكرين زمان في الرياضيات

بما ان

اذا

ه ط ث

اهو ده سبب كتابتي للموضوع ده

بما ان

انا عامل المدونه دي علشان افضفض فيها بدل ما اطق

اذا

ممكن اكتب الي انا عاوزة من غير ما حد يقعد يحسسني اني حمار

ه ط ث

الموضوع بدء من زمان شويه

في يوم من ذات الايام دخلت بالصدفه البحته على احد المواقع التي تسمي نفسها حقوقيه " المهتمه بحقوق الانسان يعني " في مصر

المهم تفاعلت جدا مع الناس دول وحسيت انهم فعلا بيحبوا مصر وبيتكلموا من منطلق سليم.

لغايه ما جاء اليوم الي تاكدت فيه من ان حسهم الوطني وحبهم للحريه ينطبق فقط ضد الاسلام

اما اذا كان موجه ضد هذا الاسلام فانه يندرج تحت بند حريه الرأي

يعني لو مسلم قال بم

تلاقي 20 واحد مسكوة غسلوة بحجه انه وهابي وارهابي

ولكن اذا قال ملحد او اي شخص عن الاسلام تارالملم فيبقى ده حقه ودي حريه رأي والمخالف ليها متخلف

الطبيعي اني انسحبت بعد ما اعطيتهم درسا اعتقد انهم لن ينسوة سريعا

المهم اني خلال هذه الفترة تعرفت على مجموعه منتقاه اعتقدت انهم يختلفوا عن البقيه وبالفعل انشأنا موقعا آخر يدعم حريه الرأي المسؤله وبالفعل بدانا منذ ما يقارب السنتين نضع نصب اعيننا اهداف كلها تصب في مصلحه مصر بين شجب قمع الحريات وتشجيع تقبل الآخر وتوثيق التعايش بين المسلم والمسيحي كنسيج للامه واعتقدت اني بكوني امثل التيار الاسلامي المعتدل في الحوار فاني بهذا اجذب باقي التيارات المعتدله.

ولكن هراء كانت احلامي

فالتعصب تغلغل في الشعب المصري تغلغل الورم الخبيث في اعضاء الجسم حيث لن تجدي معه علاجات

واصبح التعصب هو السمه الغالبه والعاليه الصوت في كل المحافل وفوجئت بما لم اكن اتصور ان اقابله يوما

حين تصف احد بانه ليبرالي فانك تعني انه انسان يدعم الحريه ويدعم المقوله الشهيره

الاختلاف في الرأي لا يفسد للود قضيه

ولكن الجديد حين ترى ليبرالي راديكالي متعصب

جمله غريبه صح؟

ازاي ليبرالي وراديكالي اذا كانت كل كلمه هي نقيض الاخر

اصبح هناك لبراليين متعصبين لارائهم التقدميه بحيث اخد الحوار منحنى فرضها على الاخر او اعلان الحرب عليه

نعم هذا بعض ما حدث

فوجدت نفسي بين ثلاث طوائف

مسلمين لايعرفون عن الاسلام إلا قشور ويصرون التحدث باسمه جاعلينه اضحوكه بين الجميع

مسيحيين متعصبين ضد اي شيئ يمت يوما للاسلام

منتسبين للاعتدال زورا وبهتانا وتخفي نفوسهم العفنه الكثير والكثير

هنا آثرت الانسحاب مرة اخرى

ولكن هذا الانسحاب آلمني كثيرا

فمن الصعب ان ترى اناساً وثقت فيهم يوما والخداع يتسرب من بين كلماتهم لتظهر وجوههم القبيحه على حقيقتها امامك

لك الله يا مصر

ستشقى دوما بابناء لم ولن يقدروك حق قدرك

التعصب مرض تغلغل بين ظهرانينا ونحن في غفله

واصبح التعصب والتعصب المضاد هم السمات الرئيسيه للحوار

واصبحت المنظمات والهيئات الحقوقيه مجرد ديكور يخفي خلفه اهداف لن تُرى بسهوله

ضاعت الكلمه بين معانٍ كثيرة وضمائر عفنه حورت طهرها إلى معان عاهرة تلوكها السن تتشدق بحريه مزعومة وتنفث سمومها في مجتمع مريض

حزين انا

هديتي اليك

2009-03-07T17:58:00.003+03:00

همساتك ولمسة من يديك تحييني

وقبلة تطبعيها على جبيني

تجعلني دوما على يقين

انك سر الحياة

يغادرني قلبي شوقا اليك

ابحث في الوجوة عن عينيك

يداعب خيالي لمسة يديك

وهمس الشفاه

اليك يا من ملك فؤادي

ومحى بسحرة ذكرياتي

اهدي اليك بكل اشتياقي

قلبي والروح

في بيتنا مراهقتين

2009-03-07T15:00:00.004+03:00

عارفين الحكمة القائلة

إذ بي اُفوجأ

اهو دة الي حصلي يا بشر.

امبارح كان عندي نونه صغنونه حاجه كده ايزي ويزي بلعب بيها واشيلها على كتفي واحنا في اي مكان
الصبح لاقيتها مودموزيل ومش طايقاني ولا طايقه اي حد ولا طايقه نفسها من جمالها وحلاوتها
وطبعا مش طايقه اخواتها ولا اختراق خصوصيتها واي حاجه تطلع زي باجور الجاز الي عاوز فونيه واقل كلمه مني او من مامتها الاقي دموع التماسيح انهمرت كالامطار.

وإذا بزوجتي العزيزة تهمس لي
ياحبيبي دي مرحله المراهقه
وهبطت الكلمات على اذني كالصاعقة

يالهوي
لولو بقت مراهقه؟

امتى؟

وكيف؟

ولماذا؟

ولعل؟

وبدأت غصب عني اراقب تحركات فراشتي الجميله لعل استنتاجات امها خاطئه

للاسف
مهياش غلط

فراشتي الجميله اصبحت تميل إلى الانفراد بنفسها ومشهده التلفزيون مع نفسها
ده غير الساعه ونص الي بتقضيهم الصبح علشان تلبس وتروح المدرسه
وتنزل للمدرسه على سنجه 10

وطبعا اصبح ممنوع على تماما دخول غرفتها طالما مغلقه وارسلت لي تحذير شديد اللهجه مع والدتها بخصوص هذا الامر تحس انه صادر من مجلس الامن مع التلميح باستخدام القوة العسكريه إذا تم مخالفة الاوامر

طبعاً غير نوعيه الافلام والمسلسلات التي اصبحت تميل لمشاهدتا
فبعد ما كان التلفزيون يعمل 24 ساعه لصالح قنوات MBC3 و Cartoon Network اصبح يعمل 24 ساعه برضه بس لحساب Fatafeet و MBC4 و MBC2 وغيرهم واصبحت الافلام الرومانسيه هي المسيطر الاول والاخير على عقل فراشتي ( مش لاقي وش بيعيط )

طبعا هذا غير سيل الاسئله الي نازل على حرمنا المصون زي المطر عن الحب وعن العلاقات بين الرجل والمرأه وعن الزواج وعن اي شيئ يخص هذا الموضوع.

وطبعا نحمد الله ان حمنا المصون لديها كم رائع من الثقافه بما يسعفها في التعامل مع مثل هذه الامور بدايه من "انا فاهمه ال sexual production بس ازاي ال Sperm بتوصل لل uterus "ادي الي اخدناه من التعليم الاجنبي " لغايه اسئله بتخلي حرمنا المصون تتورد خجلاً مع البحث المضني عن الاجابات المنطقيه لمراهقتنا الجميله.

وطبعا لازم نتقاعل مع هذه المرحلة ولا سيما ان الاولاد في مدرسة تضم طلاب من مختلف الجنسيات والثقافات فالحصول على المعلومات الصحيحه عن طريقنا افضل الف مرة من الحصول عليها من صديقتها اللبنانيه القادمة من الولايات المتحده الامريكيه رأساً.

حد هيسألني طب ليه يا كابتن لطيف مش عاوزها تاخدها من اصدقائها
اقول لك يا سيدي

اصدقائها دول اول ما شفتهم جالي حاله ازبهلال نفساوي منبثق من اللاشعور المركزي ادى إلى حصولي على لكزة تنبيهيه من زوجتي العزيزة علشان معملش فضايح.

المفتوض ان صاحباتها دول مابين ال 11 و ال 13 عام " في نظر واحد متخلف وجاهل زيي اطفال " فلما الاقيهم عاملين شعرهم ميش " الي هو خصله وخصله يا جاهل بلاش فضايح " وعاملين حواجبهم لابسين ولا الي رايحيين حفل ازياء الربيع لجافينشي يبقى لازم ازبهل.

دي ستيته لو كانت شافتهم كانت وقعت من طوله.

وطبعا انا اول ما شفتهم اصبح الفك السفلي المتواجد اصلا في وجهى على مستوى افقى مع حزام البنطالون واجحظت عين اخوكم حتى يخيل للمساهد الكريم اني اصبت بمس كهربائي ل 3600 فولت.

وطبعا كل هذه المظاهر ادت إلى اللكزة التنبيهيه من حرمنا المصون التي اسرعت لاستقبال السيدات آسف الانسات بالترحاب والقبلات " يادي النيله "

الفاجعه الكبرى بقى حين فوجئت بهذا الخبر

فراشتي اصلا كبرت لدرجه انه بتلبس من لبس مامتها عادي؟

- عادي؟
ده انا وعلى وجهي نفس نظرة الازبهلال مرة تانيه حين قالت لي حرمي المصون عادي لما شفت لولو بتاخد بنطالون مامتها لانها مش عاجبها حاجه من لبسها وهي رايحه لصاحبتها ده غير البوت والبلوزة من الاخر كله.

- عادي ازاي يعني مش كل سن وليه لبسه؟

- اولا انت مش عايش معانا ومش واخد بالك ان بنتك بقت مودموزيل اد الدنيا وبقت طولي؟
ولا تقصد اني عجزت؟ " يادي الحوسه يعني اي من الاجابتين هتروح في داهيه يا ضايع وهينتهي بك المآل للنوم على الكنبه النهارده لم الدور يابني.

- ابدا يا روحي بس انتي بنوته كبيرة وهيه لسه بنوته صغنونه
لا يا سيدي مهياش صغنونه مانت لو مديها اهتمام كنت عرفت ان بنتك في ادق مراحل حياتها ولازم نحتويها ونحسسها بسنها ونعيشه معاها بدل ما تدور على صاحبه منعرفش دماغها تعيش المرحله معاها

- صح يا حببتي بس برضه كل سن وله جماله مانتي متخليهاش هي الي تمشيكي وفهميها ان كل سن وليه جماله وليه الي ينفع فيه وليه الي مينفعش.

- متقلقش انت ولو شايفني مش اد لمسؤليه اتفضل انت وعيش

- لا وعلى ايه ده انت قدها وقدود يا جميل حد يقدر يقول غير كده
الحوار ده طبعا خلاني اخد بالي من كارثه اخرى

حرمنا العزيز اه تقريبا والله اعلم حصل لها ارتداد نفسي وحست ان لولو كده هتكبرها فرجعت لمرحله المراهقه هي كمان

يادي النيله يا ضايع هتلاحق على اتنين مراهقات في البيت ازاي
حد عنده نصايح ولا كله عامل زيي وقرر ان تصدير العبيطه هو الشعار الامثل لهذه المرحلة؟
كان معكم مراسلكم ضايع من قلب الحدث

ندالة

2009-03-04T02:03:00.007+03:00

مراتي مصرة ان الي عملته حركة نداله. بصراحه معنديش مشكلة شغال جدا.

ماهو يا ابقى اب يا ابقى بركة البيت وده لانونكن ابداً.

الي حصل ان من اول ما ربنا رزقنا باول نونو واحنا متفقين ان محدش من الاولاد ينام معانا في الاوضه.

حقي يا بشر

هم كام يوم واقلب على اوضه تانيه

المهم

آخر العنقود المدام ضربت هذا الاتفاق واخلت ببنود اتفاقة حروق اللسان وسعادتة مشرف اوضتي بقاله سنه ونص.

واخوكم مطنش وعمال يقول هي هتحس لوحدها ولا هتعمل اي منظر وهي مصدرة العبيطة ولابسه وش ام السعد يام السعد.

طيب انا ذنبي ايه كل ما احب اضرب سوجارة اروح اضربها في المطبخ؟

ياخوانا ده معملتهاش ايام ثانوي هعملها النهارده؟

ده غير اني طبعا مطالب اني اصحى الصبح امشي على طراطيف صوابعي لحسن حبيب امه يصحى

والبس يا في هدوء تام يا في الصاله

تييييييييييييييت

ليه يعني ؟

المهم

بما ان وش العبيط طول قررت اني آخد موقف ولا موقف احمد حلمي

في يوم من الايام قررت اني استلف وش العبيط لفة وارد على الخبيثه بادنيئه

اهم حاجه تعرف مراتك تيجي منين

هي بتحب التجديد جدا ومتعرفش تعيش روتيني " ودي مصلحه جدا "

لعبت انا بقى على ده

قلت لها

- ايه رأيك يا حببتي نغير نظام الشقه

- ياريت يا حبيبي انا حتى زهقانه " مع نظرة سعيده ولا الي لاقت مصاصه حجم عائلي "

- طيب بصي

احنا نعمل الاوضه دي كذا والاوضه دي كذا وبما اننا هنغير يبقى بالمرة نودي سرير ننوسو مع اخواته ونعمل لينا قاعده في اوضتنا ولا القاعده الامريكيه في البحرين لزوم الاستكنياص

- يالاهوي عاوز تاخد نانوسي من حضني؟

- ماهو يا انا يا نانوسك في الاوضه دي من الاخروعلى بلاطة سراميك كليباترا 60*60

- طيب يهون عليك

- مش احسن ماتهوني انتي ؟

- لأ طالما وصلنا للدرجه دي اهي اوضة اخواته احسن من محكمه الاسرة

تصفيق حااااااااااااااااااااااد

واحد من الجمهور

هتاااااااااااف

يالعبك يا عم ضايع يا رافع راس الضايعيين

تاني يوم رجعت من الشغل لاقيتها بتنقل سرير نانوسو وعامله مظاهرة في البيت ولا فيلم شيئ من الخوف وتردد ووراها الاندال

نقل سرير نانوسو من اوضه مامته بااااااااااااااااااااااطل

ويرد الاندال الثلاثه

باااااااااااااااااطل

والنبي لو غنتولي خاف الله خاف ابداً

انا حصلت على الفوتيه وطفايه السجائر في اوضتي واخدت ترابيزة مجانا عليهم

ده غير اني مش هصحي على رجل 20 سم ضاربه في قفايا بلليل وواحده بتصوت خد بالك لتفعص نوسه اتاخر على الحرف

كمان !!!!!!!!

ده ايه ام الظلم ده

يعني مش عاجبه ان سريره في اوضتي وكمان عاوز يطرني منها شر طرده

ابدا

المهم اني حصلت على الاستقلال واعلنت هذا اليوم

My independence day

اينعم نانوسه بينظر لي شذراً من ساعتها وحاسس انه بيحط خطه لطردي من البيت كله

لكن هتبع مبدء جمال " عبد الناصر طبعا ياذكي " مش مبارك واقول

ما اُخذ بالقوة لا يُسترد إلا بالقوة

عشقك جنتي

2009-03-03T23:22:00.004+03:00

ربما عجزت يوما ان اراك

ربما شغلت يوما عن هواك

لكن قلبي ابداً لم ينساك

عقد ويزيد وانا في هواك متيم

عقد ويزيد وانت في عيني ملاك

هل تريدين ان اقدم على حبي دليل

ارايت رصاصة يوما سالت قتيل

ارايت زهرة يوما هجرت غدير

ارايت جنة بلا ظل ظليل

اثنا عشر عاما مرت علينا

اهيم في جنة عشقك كالاطفال

تمحين بيديك من روحي مرارة الصبار

تزيلين بها من دربي اشواك واحجار

تملاين فيها حياتي نورا ونار

تشدين ازري لأعبر الاخطار

تمدين لي جسرا بين الجنة والنار

حبي لك لم تعبر عنة يوما كلمات

وعشقي لك لن يصفة اهاة وانات

وكيف اصفك وانت كل الصفات

وكيف اقول لمن ملكت الكلمات

كيف اقول عشقت ملكة الملكات

يكفيني اني احبك منذ مولدي حتى الممات

كلمات بلا احرف

2009-03-03T15:27:00.005+03:00

منذ اول يوم دخلت فية ساحه الحوار خلف شاشات الحاسب حاولت جاهداً فتح نافذة تضيئ ولو ناحية من هوة الظلام التي وجدتها فما وجدت سوى نوافذ تهب منها عواصف الفرقة والتخاذل وكل ما يزيد الظلمة اظلاما.

لملمت أوراقي بعد أن ضاق بي افق الكلمة وأدركت أنني أتعبت قلمي في رسم خطوط هوجاء تتبعها سطور غبية ضاعت بينها معان وددت أن يفهمها من أقصد. تركت مكاني وبحثت عن مكان غيرة واستجديت الوقت لعلي أفوز بمفاهيم يدرك معانيها صُناع الجعل لكن الكلمة استعصت لا لقوتها ولكن لضياع المترادفات والتي من خلالها تتضح اسرار المقصد. عرفت أن إدراك المفهوم يتجاهله الأغبياء. أغبياء المعرفة ويصنعون من وضوحه مأتماً يلطمون فيه ويجعلون من نقائه منحراً ينحرون على صفائه ضمائر الصحوة فحاولت مراراً أن أنفذ إلى طريق الوصول فلم أجد بين ثنايا ضميرهم ألذي يتشدقون بنقائه إلا بقايا من يقظة يتفاخرون بها. فالنوايا الوردية التي تلوكها أفواههم التي لا تعرف السكوت تفقد لونها عندما تهب عليها رياح المنفعة وتتساقط منها وعود زائفة كانوا يرفعونها على رايات ثرثرتهم وأصبحت كومة في زوايا النسيان.
ليال تمر وجمود الكلمة لا يتحرك بين سطور الإيضاح.
فالكل يقرأ وعند نهاية السطور تتغير المعاني وتفقد الحروف صوابها.
يقول ذلك المسكين المنكفئ على أوراقه لو أنني رتبت كلماتي على اسطر القبول لصنعت منها قبساً يهتدي به ضال الطريق.
لكن مسألة القبول لذلك الترتيب تجرحها دائما سهام الرفض فيبقى الحال مشاعاً تتلاعب به هرطقة المتأولين.
سعيت جاهداً أن أعبر بكلماتي نفق إصفرار الرأي فما وجدت إلا زاوية ضيقة بها ممر لا يسمح بالرؤيه لكثرة تزاحم عفن الضمائر عليه والتي جعلت من التفكير في عملية الخروج إلى ساحة النور معضلة تتبجح بغموضها.
فعدت إلى مكاني أتلمس أوراقي لعلي أجد بينها ورقة تحمل معاني تقهمها خلطة بلهاء في جماجم صماء فما وجدت إلا بقايا كلمة تناثرت بين قصاصات الورق.
مسحت اطراف سطوري وكتبت عليها حروفاً من خارج الأبجدية أصنع منها كلمات لها صوت, فالصوت أحياناً أبلغ من همهمة القراءة تكون عنواناً كبيراً على ورقة مقلوبة يستطيع قراءتها أهل الأنوف الطويلة الذين يحشرون أنوفهم في كل شاردة وورادة لعلهم يعرفون سؤالي, فهم لا يقرأون السطور النقية.
تلمست قلمي تحت أكوام أوراقي فما وجدته إلا بعد بعثرة سقطت بعدها ورقة كتبت على طرفها .. من عرف نفسه لايضره ما يقوله الناس .. فعزمت أن أصنع من يأسي قوة تساعدني بألا افقد أوراقي حتى ولو أجد إجابة على سؤالي.

إعتذار

2009-03-02T10:10:00.008+03:00

شفت دمعة بعيونك وكنت انا الغلطان

احاكم نفسي بنفسي طالما انا الجاني

لو يجفف دموعك صلبي على الحيطان

صلبي فدا دموع علي اغلى من روحي

روحي لمين تبقى ولمين اكون ولهان

ولمين ابث الشوق الي كوى ضلوعي

انا خطيت في حق اغلى واحن انسان

انا بادلت حبه اليوم بجحودي

انا من رمى من يدية نعمة الرحمن

وجحدت جنته وما رضيت بيها

وجريت ورا حلم وندهه من شيطان

ورضيت ادخل جهنم وارتضيت بيها

ان قلت مشتاق ولجنتك ولهان

ولنهر حبك بغني ولحنان ايدك

ان سامحتني يوما فهوده الغفران

وان عذبتني فهموت وانا قلبي بيريدك

اول صدام

2009-02-09T11:14:00.013+03:00

في البداية لازم اشيد بالي اختار مكان الغرزة واعتقد انه الان في التخطيط الاستراتيجي للقوات المسلحة.

موقع الغرزة موقع استراتيجي جداً ... لية 6 مداخل كبيرة جدا بحيث من المستحيل عمل " كبسه " على الغرزة بأي عدد من المدرسين او الضباط والعساكر.

مش هعرف اوصف لكم الموقع بالضبط علشان كده ارسمهولكم احسن

مش بقول لكم عبقري .... علشان كده وعلى مدار 3 سنين في السعيدية لا شفت ولا سمعت عن كبسه ناجحة على الغرزة

لانه وبالاضافة لموقعها الاستراتيجي المتميز كان هناك "الناضورجية" الي بيصرخوا " كبسسسسسسسسسسسسسسسا" لو لمحو اي تحرك مريب من قبل الاساتذة او الضباط في المحيط الخارجي للغرزة.

نرجع لايام سنة اولى إلي مش عسولة

طبعا انا بعد اليوم الاول خلاص اخوكم واعي وبيتعلم بسرعة تاني يوم يا مبارك كنت رايح بقميص متشمر لحد الباط وخارج من البنطالون ومفتوح الصدروضارب على كتفي شنطه فاكرين الشنط الصغيرة قوي الي كانت بحبل ؟ حاجه كده بالكتير تحشر فيها اجندة بس مش كبيرة.

والشعر اتقلب "بانكي" وبقيت سعداوي اصيل.

مش معلق معايا من مدرسين ثانوي كتير على عكس مدرسين اعادي وابتدائي إلى لسه فاكر اسمائهم لحد النهارده

جايز لان تاثير السعيدية علي مكانش عن طريق المدرسين لكن عن طريق الطلبه اكتر.

المدرسين إلى علقوا في ذاكرتي

مستر صامويل

استاذ مصطفي

استاذ عبد الجبار

استاذ درويش

مدام هدى

جوز الست وده ليه قصه طين هيجي وقتها

الشيخ قرد وده ليه قصص

مدرس كيمياء سنه تانيه " مش فاكر اسمه لكن ليه معايا ذكرى سودة "

كل واحد من دول انا فاكرة لان ليه موقف او اكتر معايا مش هنساهم ابدا

اول واحد مدام هدى

كانت مدرسه الفرنساوي في سنه اولى وهي السبب الاول والاخير في كراهيتي المطلقه وفشلي التام في تعلم اللغه دي من كتر ما كرهتها

المصيبه ان الي يسمعها ميشوفهاش يعني كانت حاجه ميني على الاخر متبانش وسطنا واحنا كنا جيل افضل كتير من الاجيال المنيله الحاليه يعني نعتبر بالنسبه للي بنشوفهم في ثانوي الان عمالقه مش عارف العيال اتسخطت ولا ايه؟

المهمدي كانت تدخل الفصل تصرخ مش تتكلم

"انا في حصتي ارمي الابرة اسمع رنتها "

تسمعي رنه ايه يا حاجه دي الارض خشب

ده كان احد اخف التعليقات الي بتقال كل حصة

هي تسمع تعليق وتبدء وصلة ردح

طب يا عيال خلاص خليكوا انتوا الكبار وطنشوها

ابدا يقوم كام واحد يوروها الردح على اصولة

تروح نص الحصة وكان الله بالسر عليم

طب كام مرة اتكرر الموضوع ده

كل حصه ليها يا بشر

عارفين الفيلم الي تفوة 100 مرة

اهو ده بالضبط الي حصل

نرجع لصديقي الصايع واحد اساتذتي في الصياعه المبكرة " بالنسبه لي طبعا انا بالنسيه له كنت متأخر جداً"

هو بالمناسبه قابلته بعد سنين طويله من التخرج لاقيته ماشاء الله بقى مخبر في احد اقسام الشرطه

المهم

كل يوم في الفسحه يروح ساحبني من ايدي وطيران على الغرزة يلحق يضرب سجارة قبل الوقت ما يخلص

وطبعا كل يوم يعزم واخوكم اسد ابداً يعني ابداً

لحد ما مرة قالي ماهو بص كده شكلك وحش يعني جاي الغرزة تعمل ايه تشم ؟

امسك السجارة وخلاص علشان منظرنا امام الاخوة الصيع وسمعتنا في المدرسة متضربش

بس من مسكه لسحب بس مش على الصدر لشرب لادمان ويا قلبي لا تحزن

بقى فيه مشكله تانيه

كده عاوز اشتري سجاير

على ما اتذكر كان ايامها الكلوباترا ب 30 قرش العلبه

هييييييييييه ايام

وانا كان مصروفي 25 قرش بحالهم

مش بقول لكم ايام

وطبعا مكنتش بشرب علبه في اليوم دي العلبه كانت تقعد معايا اسبوع او 10 ايام

طيب كده فيه خطتين لازم يتحطوا

الاولى ازاي ادخل السجائر المدرسه لان المدرسين عملوا خطه جديده بقوا يقفوا على باب المدرسه الصبح يفتشوا عينات عشوائة من الطلبه وهو داخلين تفتيش ذاتي ......

ودي كنا بنتفنن فيها

واحد يسيب سجايرة معانا برة ويدخل ويلف نناولة سجايرنا من على السور وبعدين ندخل

والي ميجبش علبه يجيب بس سجارتين على قد اليوم وتحطهم في شعرة " والفالح يطلعهم "

او جوة الكتب " وتلاقيه يا عيني في الغرزة عمال يفرد في ام السجارة الي بقت عار

المهم اننا كنا بنتصرف

المشكله الكبيرة ازاي باقي العلبه ادخلة البيت

وانا عارف ان الوالدة باشا مناخيرها طويلة في الحاجات دي وبتفتش حاجتي من ورايا

احطها في الشراب لحد ما ادخل ؟
مينفعش لاني باقلع الجزمة والشراب على باب الشقة طبقا لتعليمات الحاكم العسكري الوالدة باشا

اسيبها في الشنطه وبعدين انقلها

ممكن تفتش الشنطه قبل ما اطلع من الحمام

المهم كنت كل يوم بعمل خطه جديدة لحد ما جاء اليوم الموعود

اختي حببتي وتوأم روحي كانت عاوزة قلم وكنت نايم ففتحت الشنطه تاخد قلم لاقت علبه السجائر

ولانها بتعزني موت

طبعاً اخدتها وطارت على الوالدة باشا

وعينك ماتشوف إلا النور

كل الطرق تؤدي إلى ... الغرزة

2009-02-08T15:32:00.005+03:00

نعود إلى السعيدية
تخيلوا واحد بيعتبر انه يقول لواحد يا حمار ذنب ... يروح مكان اول يوم يلاقي من على الباب الطلاب بيصبحوا على بعض " صباح الفل يابن الـ ### " !!!!

هيحصلة ايه؟ ؟
؟

دة بالضبط إلى حصل معايا
!

اول يوم رحت وزي اي واحد اهبل رايح لابس اليوني فورم المعفن القميص اللبني والبنطلون الكحلي وفاكر نفسي رايح مدرسه وشايل شنطه كتب وداخل يا مبارك لا بيه ولا علية لاقيت عالم تاني...

التراب يصل إلى خمسين متر علوا
الاصوات يصعب قياسها بالديسبل
الشتائم تنهال كالمطر !

ايه ده هو انا فين يا جدعان؟

بقى بعد مدرستي الاعدادي والتي لم نكن نستطيع ان نفك الكرافت حتى في الطريق للمنزل خوفا من ان احد الاساتذة يرانا ويبقى نهارنا اسود تاني يوم لاننا اخلينا بمظهر المدرسه آجي هنا ؟

!

طبعا انا وقفت وفكي الاسفل يلامس ركبي وعندي حاله من الازبهلال الي يقارب الهطل

...

واحد جه وسالني سنه اولى ؟
هكذب يعني واروح النار ؟

جاوبتة ايوة رغم انه واضح انه كان غبي رسمي لان مفيش غير بتوع سنة اولى هم الي بعضهم لابس الهطل الي انا لابسه ده ..

قالي باين عليك وفي اولى كام؟
قلت له سابع

قالي وكمان متفوقين ده انت ايامك سودا يابني ؟
ليه بس ؟

بص هنا الي زيك بيتاكل صاحي ومفيش اجدع منكم يتاكل عليه عيش؟

هنا اخوكم بقى بيهر
هو انا دخلت السجن وانا مش واخد بالي ياددعان ولا إية العوبارة؟

إلى انقذني واحد صاحبي من اعدادي بس من العالم الي كنا بنقول عليهم في المدرسه صيع وياي ومن الصعب اننا نتكلم معاة " شوفتوا الزمن " !!

لاقيته جاي ... مين بسبس " دة الي هو انا " بالحضن يا معلم
موووووووة موووووووووووة "
ريحه السجائر خانقه يا بشر " بس مش مهم المهم اني مش هتاكل صاحي معايا اهو واحد بورم :)

المهم بعد شوية رغي ملهومش لازمة عرفت ان اخوه الاكبر في سنه تالتة ادبي يعني لينا حماية رسمي...

واحد هيسالني ليه حمايه رسمي ؟؟

هقول له لان بتوع تالته ادبي يعني صايع رسمي وضايع برخصه وبلطجي معاه تصريح بلطجه درجة اولى ممتازة

وطبعا اول سؤال سالهولي " ايه يا عم الي انت لابسه ده ؟ " انت عاوز تضحك الناس علينا ؟

معلش يا جميل مانت عارف لسه معرفش الوضع ايه بس انت اخوك مفهمك.
طبعا هو "مفطني " على " التوتية "كلها بص انت تنسى كلام اعدادي ده خالص
انت بقيت في ثانوي
يعني لا يوني فورم ولا يحزنون
ماشي يا عمي اهو كده برضه احسن
وبعدين ايه يابا البؤجة اللي انت شايلها دي ؟
دي الكتب

"ضحكه ساخرة عاليه" كتب ايه يا عم الحاج مش بقول لك انسى؟

امال يا عمي هنعمل ايه في الفصل
بص يا بركة
لو هتدخل الفصل فحل قوي اجنده صغنونه كده تكتب فيها الكلمتين وكان الله يحب الجدعان

يانهار طين يعني اروح البيت اقعد ابيض الدروس كلها الاول قبل ما اذاكر ؟
تبيض ؟ تذاكر ؟ ده انت هتاخد مني مجهود جامد قوي

الله يعينك على مابلاك معلش البركه فيك وانت عارف اخوك ملهوش في المواضيع دي
متقلقش انا هفهمك كل حاجه
تعالى الاول اوريك اهم مكان في المدرسه
ايه؟
تعالى بس
تفتكروا طلع ايه اهم مكان في المدرسة

الــــــــغــــرزة

اي والله هي اسمها كده بين الطلبه وحتى المدرسين وضباط المدرسه

الــــغرزة

لو بدينا يا حبيبي

2009-02-07T15:59:00.008+03:00

حــــلوة اغنية حلم

فعلا لو هبتدي الكلام هبتدي منين ... من الاخر ولا من الاول ؟

اقولكوش نبدء بفوضى

يعني شوية من الاخر وشوية من الاول
مش من الاول قوي يعني بس الاول إلى يعنيني
اول مراحل الضياع

اعتقد ان اول مراحل الضياع عندي كانت دخولي المرحلة الثانوية

وما ادراك ما المرحلة الثانوية

الوالدة باشا ودي فعلا اعظم عظمات الستات بلا منازع اصرت اني ادخل زي خالي السعيدية الثانوية العسكرية
ليه يا امي انا عاوز ادخل الاورمان زي اصحابي كلهم هيروحوا الاورمان ودي اقرب للبيت
لا تدخل السعيدية علشان عسكرية وتتعلم الانضباط لانك خلاص بظت

انا ؟

دة انا بالفعل كنت في المرحلة دي ملاك

....
يعني لو كنت شتمت واحد وقلت له ياحمار اقعد استغفر ربنا باقي اليوم
يا حبيبتي يهديكي يرضيكي
ابداً
طبعاً ونظرا لان الوالدة باشا متسلطه إلى مالانهاية سلمت بالامر الواقع
ورحت السعيدية مصنع الرجال

....

..........

...

النهاردة رحت مكتبي الصبح وكالمعتاد من سنة تقريبا قرفان ومش طايق الدنيا ووصلت لمرحلة الملل اللآنوهائي
مفيش اي حاجه بقت تشدني بقضي حياتي يا في المكتب قاعد على النت اشوف اخبار الدنيا وارازي في اصدقائي على دولة ابناء مصر يا بقراء الاخبار علشان ازود حالة الاكتئاب إلي عندي جايز ربنا يكرمني وتجيلي جلطة ولا انفجار في المخيخ وانجز

اينعم صعبان علية اقماري الاربعة وطبعاً حب عمري بس ما انا برضة هريحهم من الغباوة الي بقت معششة في نوفوخي وهسيبلهم كمان خميرة كويسة من البوليصة إلى عملهالهم يعني شويتين وهينسوا.
وبعد ما اروح اتغدى وانام وبقى عادي جداً اني انام من 5 او 6 المغرب إلى تاني يوم الصبح ما انا هصحى اعمل ايه؟ اقعد افكر في المشاكل الي ورايا؟ والمشكله الكبيرة ان كل مشكله منهم ملهاش حل في ايدي يعني كده او كده تفكيري ملهوش اي قيمة وبمعنى اوضح محصلته صفر كبييييييييير.
والله ليها الجنة الست الي مستحملة قرفي دي
12 سنه مستحملة جناني الله يعينها
والمشكلة انها ميأستش مني ولسة يا عيني بتحاول معايا
..............................
......................
..........

هرجعلكم وايه إلى حصل في السعيدية - مصنع الرجال -