الأربعاء، 12 أغسطس 2009

رمضان كريم

كل عام والجميع بخير
ايام تفصلنا عن شهر الخير والرحمة
فقولوا معي اللهم بلغنا رمضان وارزقنا صيامة وقيامة وتقبلة منا خالص لوجهك الكريم
طيب ايه رأيكم نخلي التدوين لة قيمة مضاعفة في رمضان
يعني " وده على سبيل المثال وليس الحصر" نخلي تدويننا في رمضان منحصر في الثقافة الدينية
سواء كانت محاضرات او اجزاء من كتب او ادعية وابتهالات
وبرضه ممكن نشجع بعض على بعض اعمال الخير زي الاتفاق على قراءة القرآن مع بعض
وممكن كمان حفظ القرآن وممكن نسمع على بعض على الماسنجر مثلا
فيه اكيد افكار كتير ممكن تيجي من ناس كتير منكم واكيد ده انشاء الله هيكون احد اسباب زيادة ترابطنا لاننا هنكون بنساعد بعض في طاعة الله
دعاء الرسول (صلى الله علية وآله وسلم) عند رؤية هلال شهر رمضان
" اللهم اهله علينا بالامن والايمان, والسلامة والاسلام, والعافية المجللة والرزق الواسع, ودفع الاسقام, اللهم ارزقنا صيامة وقيامة وتلاوة القرأن فيه, وسلمه لنا وتسلمه منا وسلمنا فيه"
دعاء الامام علي عند رؤية هلال شهر رمضان
" قل اللهم اني اسالك خير هذا الشهر فتحه ونوره ونصره وبركته وطهوره ورزقه, واسالك خير ما فية وخير ما بعده, واعوذ بك من شر ما فيه وما بعده, اللهم ادخله علينا بالامن والايمان والسلامة والاسلام والبركة والتقوى والتوفيق لما تحب وترضى"
اللهم صلي على عبدك ونبيك ورسولك سيدنا محمد صلاة وسلاما تامين متلازمين إلى يوم القيامة وعلى آلة وصحبة اجمعين

الاثنين، 10 أغسطس 2009

بدون عنوان

كنت باتكلم مع الصديق ابو العريف وكنت ناوي اكتب بوست علشان حاجه اتفقنا عليها لكن ياللاسف

قبل ما اكتب وانشكح قرات قرار الحكومة الرشيده بتاع ترشيد استهلاك النت

مش عارف ليه اول ما قرأت الخبر افتكرت نكته كوبري اكتوبر

هقولهالكم للي مش عارفها

بابا مبارك ربنا يبارك لنا فيه جاب عمو نظيف الي تعهد بتنظيف جيوب كل المصريين لاخر مليم ودار بينهم الحوار التالي

مبارك - يانظيف انا عاوز اعمل حاجه الناس تفتكرني بيها ونداري شويه بيها على البلاوي الي بنعملها

نظيف - بسيطه يا ريس نخلي الي يطلع كوبري اكتوبر يدفع 10 جنيه الناس هتهيج انت هتلغي القرار والناس هتصقفلك

مبارك - ممتاز يا نظيف نفذ

بالفعل تم صدور القرار ونزل السيد الرئيس لمتابعه الموقف

ملاقاش الي حاجه

كل واحد بيدفع ال10 جنيه ويمشي من سكات

مبارك - ايه يا نظيف الناس لا هاجت ولا حاجه

نظيف- بسيطه يا ريس نخلي الي يطلع يدفع 10 جنيه والي ينزل يدفع 10 جنيه

مبارك - حلوة كده اكيد مش هيسكتو نفذ يا نظيف

مبارك يتابع الموقف وبرضه مفيش اي حاجه كل واحد بيدفع ال10 جنيه وهو طالع وزيها وهو نازل من غير ولا كلمه ولا اي حاجه

مبارك - ايه يا نظيف محصلش برضه اي حاجه

نظيف - بص يا ريس انا هعرف اخليهم يعترضو هنخلي الي يطلع يدفع 10 جنيه وهو طالع و10 جنيه وهو نازل وياخد كمان قفا على قفاة

مبارك - نفذ اما نشوف اخرها ايه

مبارك يتابع الموقف والناس طوابير عند المنزل كل واحد بيدفع ال 10 جنيه وياخد القفا وينزل من غير ولا كلمه

لغايه ملقى راجل صرخ وقال حرام مش كده وعمال يزعق

قال بس فرجت اهو واحد نطق

مبارك - مالك بس يا مواطن فيه ايه معترض على ايه؟

المواطن - ياريس مش معترض على الفلوس ولا على الضرب بس زودوا عدد الناس الي بتضرب شويه علشان الزحمة :)

المصيبه ان رئيس الحكومه المفروض انه راجل بتاع نيله علم

والانيل انه راجل بتاع هباب اتصالات

طيب فيه بقى سيناريو تاني خالص انا تخيلته غير التحليلات الكتير الي قرأتها عند الكثير من الزملاء

الانتر نت النهارده اصبح ليه دور مؤثر زي ما حصل مثلا في موضوع اضراب 6 ابريل وزي مواضيع التعذيب في اقسام الشرطه وغيرة

وطبعا لان عندنا حكومه انصح من ام اي حكومه لاي شعب صايع

قررت انه بدل ما تغلق مواقع او تعمل بروكسي او غيرة لا

الافكار المنوفيه تشتغل

ايه يوجع المصري

جيبه

خلاص غلو النت علشان يخفو علينا

ادي القصه

يعني من الاخر لا فيه استهلاك غير عادل ولا غير سوسن

الموضوع الحكومة المتهالكه بتحمي نفسها

يعني عاوز تشتم في الحكومه وترفع افلام الفضايح بتاعتها تدفع بقى يا حلو

ودي مجرد البدايه

لو مشيت بكرة هتلاقو فكرة تانيه اوسخ لغايه ما النت ده يصبح شيئ صعب المنال

طبعا الموضوع يعكنن اي حد بس ادينا هنشوف هيرسى على ايه وانا متاكد ان الجماعات الحقوقيه مش هتسكت واعتقد انه هيبقى فيه مواقف اكبر من الاعتراض بايميلات ومش بعيد انها توصل لمظاهرات اصل خلاص كده كله جاب جاز

ما علينا

الموضوع الاصلي بقى الي كنت عاوز اقوله اني طبعا من باب الني اتغظت جدا من تجمعكم قررت انا وابو العريف اننا نجمع الاخوة المدونين المشردين في الارض في السعوديه علشان يبقى اول لقاء لينا سويا طالما اننا كلنا في غربه واحده

وده هيكون انشاء الله في العيد " طبعا لان كل واحد منا في مدينه وبيننا مسافات ولا بتاعه ناديه مصطفى "

وبكده مش هيكون فيه مدونين احسن من مدونين انتو بتتجمعو في القاهرة واحنا كمان هنتجمع هنا :P

الأربعاء، 5 أغسطس 2009

بساء الخير

طبعا لو قلت لكم اد ايه افتقدت الجميع وافتقدت المتعة في القراة في مدوناتكم مش هتصدقوني بس فعلا والله افتقدت الجميع الفترة الي فاتت وكان غصب عني فعلا كنت في مرحلة صعبة مكنش عندي اي مقدرة على الكتابه او حتى التفكير غير في دوائر محددة كانت هتصيكم باكتئاب مزمن لو كنت شاركتكم فيها.
طبعا انا امامي حاجه بتاعه 13 29 يوم ى ما اخلص اللف في مدوناتكم واعرف اخر اخباراتكم الفنيه والعقليه " دة لو كان لسه باقي :) "
النهاردة كنت بافكر في موضوع سخيف وبما انه سخيف قلت اشارككم فيه وآخد رأيكم " شريييييييييييير"
هو موضوع على قدر ما تسبب لي في قلق بالغ لكن اصابني ايضا بنوع من الاحباط المتوازي مع القلق
ابنتي الكبرى " لولو" اصبحت مراهقة
واحد يقول لي طيبب عادي ايه يعني ؟
هعرف علطول انه معندوش عيال من اصله او ولادة لسه صغيرين فهجاوب وهقول بكرة تعرف ياخويا يعني ايه
طيب المشكله فين
مشكلتي مش مع التغيرات النفسيه المصاحبة لمرحلة الانتقال من الطفولة للمراهقه خالص لان بصراحة زوجتي الحبيبه متوليه بحرفية بالغه الموضوع ده وعارفه تهندله ازاي ومفيش اي مشاكل والدنيا كانت بيس جدا
المشكله فيا انا
الي حصل كالتالي
لولو من يوم ما اتولدت مفتكرش اني في يوم من الايام ولاي سبب ضربتها بالعكس يوم ما كانت في كي جي 1 ومدرسه مش ضربتها لا لمستها من كتفها رحت فرجت امه لا إلة الا الله على المدرسه كلها من اول مدير المدرسه للفراشين وصوتي كان جايب 3 احياء مجاورة.
لولو طول عمرها تموت من عقاب واحد مني وهو اني اخاصمها
يعني كان كفايه اني اقول اني مخاصمها علشان حاجه علشان تنفطر من العياط في محاوله لصلحي مع كم غير عادي من الاعتذارات والتعهد بعدم عمل الشيئ ده مرة تانيه. ده غير انها بصراحه كانت من الاطفال الي غلطاتهم مش كتير يعني مكنتش كل يوم والتاني زعلان منها بالعكس كانت تصنف على انها من الاطفال المؤدبين.
يعني كان زعلي منها عندها له قيمه كبيرة قوي جايز اكبر بكتير من زعل مامتها حتى
الموضوع ده في يوم وليله انتهى واختفى ومش اختفى وبس لا اتعكس
الي حصل انها عملت موقف مع مامتها معجبنيش فقررت اني اتبع نفس الاسلوب وجبتها وفهمتها ان الي عملته شيئ زعلني وغلط وبناء عليه لغايه ما تصححه مش هتكلم معاها ومش مسموح لها باستخدام الكمبيوتر ومحرومة من متابعة البرامج الي بتابعها في التلفزيون.
ايه رد فعلها؟
ولا حاجه
بالعكس وقفت مصرة انها ليست مخطئة وان موقفها سليم
طبعا انا مسبتش كلمها كده بالعكس مسكت دفاعها وفندته لها علشان العقاب ميكونش بلا سبب منطقى ولازم تكون مقتنعه انها غلطانه وإلا العقاب مش هيبقى له معنى
اكتشفت في وسط الحوار انها بتتحاور من مبدء العند لانها متاكده اني هبذل كل جهدي اني اثبت لها انها غلطانه علشان قيمه العقاب فهي بتلاعبني!!!!!!!!
طيب خلص النقاش وبدأنا في تنفيذ العقوبة
ايه كان رد فعلها؟
ولا الهوا
دخلت تنام
ولما صحيت؟
قعدت مع اخواتها شويه صغيريين ودخلت تنام تاني
وتاني يوم
نامته كله
وتالت يوم
مخرجتش من اوضتها
المحصله
العقاب معملش اي تأثير معاها
طيب هل دي المشكله
لا طبعا
هم مشكلتين
المشكله الاولى مشكله تربوية ودي الي عاوز اخد رأيكم فيها وبالذات الي ليهم بنات في نفس المرحله العمرية المنيله ب 60 نيله
طالما العقاب العادي دي اصبح غير مؤثر اعمل ايه ؟
ماهو انا مستحيل اضربها لما بقت طولي ده انا معملتهاش وهي نونة لسه
المنع من النلفزيون والكمبيوتر برضه معملوش اي تأثير " دماغها جزمة زي والديها هنعمل ايه في ام الوراثه؟ "
حتى اننا مناخدهاش معانا واحنا خارجين مبقاش بالنسبه لها عقاب !!!
لغايه الصيف الماضي يعني مش بحكي من زمن بعيد لولو كانت ترفض تماما اننا نخرج ونسيبها سواء لوحدها او مع اخواتها او حتى لما كنا في مصر مع جدودها او خالتها او عمتها او اي بشر
كانت ملتصقه بينا جدا لدرجة انه يوم عيد ميلادي الصيف الي فات خرج انا ومامتها نسهر وسبناها هي واخواتها عند جدها ومع خالتها اتصلت اكتر من 20 مرة لتعلن رفضها للوضع وقرفتنا السهرة كلها
دلوقتي بالعكس
هي الي بترفض تخرج معانا وبتتمنى اننا ناخد اخواتها ونخرج علشان تقعد لوحدها من غير وش تتفرج على التلفزيون ان تعيش مع الانترنت !!!!!!!!
طيب دي كده المشكله الاولى
المشكله التانيه مشكله معايا انا
وهو اني فجأه افتقدت بتوتي الصغيرة
افتقدت الي كانت بتنط في حضني اول ما ادخل من باب الشقه
فجأه لقيت واحده غريبه معايا في البيت
بجد فجأه
والواحده دي زعلي مش فارق معاها في حاجه خالص
حتى مع وجود اخواتها وانهم لسه في مرحله الطفوله واعتقد ان الفرق الي بينها وبين اختها الاصغر منها مباشرة "4 سنين " هيخلوها لسه شويه عقبال ما توصل للمرحله دي بس لولو كان ليها وضع خاص غير حتى كل اخواتها لانها الكبيرة واول ابنائي او بالتعبير الدارج اول فرحتي.
مش عارف هتعامل معاها ازاي في المرحله دي حي طبعا حاليا بقت اقرب لمامها وهي صاحبتها وانا اكني خرجت من الصورة خالص يعني العكس بكل المقاييس عما كان عليه الحال من فترة قريبه جدا جدا
مش عارف هعمل ايه وهتعايش ازاي مع الخلوق الجديد عليه كليا ده والمرحله دي هتودينا لفين؟

الخميس، 30 أبريل 2009

شكراً

ياجماعة بجد بشكر وبعتذر لكل الي سألوا عليه الفترة الي فاتت
فعلا اد ايه الموضوع ده رفع من معنوياتي واسعدني
وبعتذر عن تغيبي الفترة دي لحاجات كتير قوي
بين مشاكل في الشغل بلا حدود
والاوضاع الطين في الخليج حاليا
وحالة اكتئاب حاده جدا
كله مخليني مش قادر على التفكير حتى
ياريت يكون لي نصيب من دعائكم الفترة دي
واكيد هرجع تاني بس ربنا يعدي الفترة دي على خير
مش قادر اشكر ناس بالاسم علشان منساش حد ويزعل مني بس بجد مجرد سؤالكم عني خلاني اشعر بسعاده مفتقدها
تحياتي .

الأحد، 29 مارس 2009

no physical contact

هو كان المفروض ارد على التاج الي ستوته بعتتهولي بس بصراحه في موضوع اهم قلت انزله الاول وبعدين ادخل على تاج محل

على الرغم من اني قرفان اخر قرف وطالع بظابيظي النهارده وعملت حاجه ولا العيال إلا ان مواقف زعيم الشعب الشومبونجي زادت لدرجه لا تحتمل الاهمال

الاستاذ الفاضل انا مفهمه هو واخواته انه طبعا مفيش حد ليه الحق انه يعاقبه بالضرب لا في المدرسه ولا غيرها
غلطه معلش انا الي استاهل

الباشا عنده المشرفه العامه ست اد جدته كده حاجه بتاعه 60 سنه اي نعم ثقيله وسخيفه بس مش مشكله مش هناسبها يعني

المهم الوليه الكبارة الي قد والدتنا دي غلطت غلطه عمرها ومدت اديها عليه
محدش يسرح بخياله بعيد مضربتوش ولا حاجه دي يا دوب شدته من الجاكت

بس

وقامت القيامه

الظريف في الواد ده تلقائيته وثقته بنفسه
وقف في منتهى التناكه ( والروايه من مدير المردسه شخصيا ) وبصلها من فوق لتحت وقال لها

no physical contact
physical contact is for animals only
طبعا علشان تعرفوا هي اتقالت ازاي جربو تقولوها ولسانكم كله برة

طبعا الوليه الحيزبونه اسقط في يدها ازاي الربع متر ده يرد عليها كده
وعلشان تحفظ ماء وجهها غلطت غلطه كمان

بنت حلال وتستاهل

قالت له طيب افتح الجاكت علشان اشوف انت لابس اليوني فورم ولا لأ

غلط الست؟ اكيد لأ

بس نظراً ان الباشا كان مزاجه اتعكر خلاص فطبعا مش هيعديلها حاجه وهو يموت ويصطاد حد غلطان
بصلها تاني من فوق لتحت وقال لها

sorry اصلك مش من شجرة العيله



والله ما اعرف علاقه شجرة العيله بفتح الجاكت لغايه دلوقتي بس مرضتش اساله بدل ما اطلع انا الي جاهل
بس اعتقد والله اعلم ان فتح الجاكت امام حريم غريبه بقى عيب الايام دي . عموما الله اعلم

الكلام ده كان الصبح اول ما وصلو

الراجل دخل فصله وقال يا فتاح يا عليم ورش قدام الديسك ووضب القعده مدرسته دخلت

مش عارف ايه الهبل الي نزل عليهم النهارده بس برضه لسبب ما راحت شدته من الجاكت

وانا شاكك ان الجاكت هو السبب وهو الي بيستفزهم

نفس الطريحه الي اداها للمشرفه مضروبه في 3 للمدرسه

لانه بعد ما قال التصريح الشهير

no physical contact
اداها درس في انه عنده ودان وبيسمع ومخ وبيفهم

طبعا لكم ان تتخيلوا ان مدير المدرسه بيحكيلي وهو فطسان على روحه من الضحك من الي الباشا عمله في 2 من هيئه التدريس في يوم واحد والظريف ان مدير المدرسه معجب بتصرفه .

طيب لحد كده وهتقولوا جت سليمه ليمه ليمه
ابدا

انا عندي تشكيل عصابي والتشكيل ده في مدرسه واحده

المشرفه صغرت عقلها وقررت تحط الاولاد في دماغها ودي كانت الغلطه القاتله

حد يجي قدام الاتوبيس ويقول يارب

التلاته الي حطوها في دماغهم ودول دماغهم جزم ولا سيما لو اتفقوا على حد

تاني يوم اشتغلت قرف في الولاد فاجتمعوا وقرروا التصرف معها

البدايه

المشرفه دخلت عند سوسا المقروصه في الفصل

- قومي يا سوسا ( دي المشرفه من على الباب)

- لا مش قايمه تعالي قوميني انتي ( دي سوسا المفتريه وعينها تطق تحدي )


الوليهه اخدت بعضها تجر اذيال الخيبه بعد ما شافت في عنين سوسا نظرة الشر الشهيره

راحت على البكريه

- افتحي العبايه علشان اشوف اليوني فورم

- هو انتي موركيش غيري في المدرسه دي؟ انتي بتنزلي الصبح من بيتكم مخصوص علشاني؟ وراحت مشغله الجنونه وعياط وصريخ ولمت الادارة كلها على الوليه الهبله وراحت مدينا ميسد كول على الموبايل ( اشارة الخطر) طرت انا والمدام طبعا لاقيناها قاعده في الادارة ونفس الموقف الي حصل مع عادل امام في شاهد ماشفش حاجه وهم بيحاولوا يخلوة يبطل عياط مع البكريه ومن مدير المدرسه لاصغر موظف بيحايلو فيها ( طيب نجبلك عصير - طيب معلش حقك علينا احنا ) ودي ابدا عاوزة بابا دلوقتي وانا مش هقعد مع الوليه المجنونه دي في مدرسه واحده تاني.

مامتها اخدتها وبتهديها يعني

اتاري بنت اللذينه ده كله تمثيل وبتضحك وبتقول لمامتها لما قالوا لي نجبلك عصير تهدي اعصابك افتكرت اني لسه مفطرتش فكنت هطلب فراخ بانيه وبطاطس محمرة بس قلت بلاش لايطلعوا لا قدر الله بيفهموا!!!!!!!!!



مش بقول لكم تشكيل عصابي

طب هل تفتكروا ان التشكيل يقف عند هذا الحد؟

ابثلوتلي

انضمت اليهم زعيمه التشكيل زوجتي العزيزة وراحت ماسكه مدير المدرسه اخدته فومين غسيل ومكواه طلعته اكثر بياضا وراحت حالفه ميت يامين الولاد ماهم لابسين اليوني فورم تاني خالص ووروني هتعملوا ايه ده طبعا بعد ما سمعتهم المراد من رب العباد اننا بندفع لكم يا غجر مبلغ وقدرة وبالعمله السهله ( بتعايرهم من الاخر)

وانا واقف والله الناس صعبانه عليه انا عمال اراضيهم واقول لها عيب كده يا حببتي ترد وتقول انا ولادي الي يجي ناحيتهم اشرحه كاروهات.

مدير المدرسه قرر فصل القوات واصدر تعليمات فوريه ان افراد العصابه قصدي ابنائي الاعزاء لا يخضعوا لاي سلطه في المدرسه سواه هو شخصيا وانهم حتى لو غلطو ممنوع حد يعاقبهم او حتى يكلمهم وعلى المدرسين ابلاغه هو وهو هيتصرف.

يعني من الاخر انا مودي الولاد المدرسه يتربوا هم الي ربوا المدرسه والمدرسين واخدوني معاهم فوق البيعه.

المهم انهم مُقنعين جدا لما تسالهم عن السبب الي خلاهم يتصرفوا كده تلاقيهم بيباصوا الكلام لبعض ولا فريق البرازيل في اوجه ويقنعوا الجن انهم على حق مبين. وكله كوم وسوسا المقروصه وهيه واقفه بتفكرني بفيلم الداده دودي والبنت راسمه البراءه على وشها وبتفول للمدير كلهم وحشيين وهيه شيخ منصر.

المصيبه السوده بعد كل الي حكيته ده الطبيعي اني اسمع في الولاد درر

ابدا جبنا المدرسين بتوعهم ووالله مش عارف هو الي قالوة خوف من العيال ولا ايه بس الكل قال انهم من افضل الطلاب خلقا وعلما!!!!!!!!

وان الي حصل ده اول مرة يحصل

ياترى ياهل ترى الكلام ده اتقال تحت ضغط وترهيب من الاولاد ولا حقيقه

هذا ماستكشفه لنا الايام القادمه

كان معكم من قسم النزهه

مراسكلم ضايع

الجمعة، 27 مارس 2009

حد ياخد مراتي ويجيب بدلها مروحه



البوست ده هديه لستوته الي بتسنكر اني بانكت عن المتزوجين
وعلى الرغم من مرور سنين على الحادث ده إلا اني اقدر اقول اني وبلا فخر اعيش مثيل له بشكل مستمر




- قوم يا مصري بسرعه

اصحى

الحق الي حصل

- فيه ايه

ده انا طبعا بعد قفزة ثلاثيه من السرير مع استدارة كامله على اطراف الاصابع ولا اجدع غطاس مجاري

- شفت الحادثه الي حصلت


يا نهار ملهوش ملامح على الصبح ( الساعه 7 الصبح ) حادثه يعني يومنا ملهوش ملامح ياتارى مين؟ ومين حصله ايه ومين مع مين طبعا 1000 سؤال مروا في النافوخ بتاع الانا في فمتو ثانيه قبل ما انط بالسؤال التقليدي

- اهدي بس يا روحي وصلي على النبي مين حصله ايه؟

- دي مصيبه دي كارثه ( بكااااااااااااااء كالمطر )

لا دي كده باينها مصيبه بجد ونهار اهلك مطلعتلوش شمس ياواد يا مصري

- يا بنتي بوظتي اعصابي مين حصله ايه

- بس انا كنت متوقعه حاجه زي كده. يعني هم هيسكتوا

اممممممممممممم هو فيه ايه ؟ هو حد كان عيان وانا مش فاكر؟ طيب حد كان عليه تار وانا معرفش ؟

- يا بنتي حرام عليكي قولي فيه ايه

- المفروض هتاخد اجازة النهارده من الشغل

- اكيد مش حادثه وبلاوي مفيش مشكله انا هتصرف في موضوع الشغل متقلقيش بس انطقي حصل ايه

- طيب قوم بس الاول خد نفسك واشرب كبايه شاي وانا هقول لك

- شاي ايه ونفس ايه قطعتي نفس امي يا حببتي بطلي عياط وفهميني

- مصري مش هتصدق

- ياستي ورحمه امواتي هصدق

- هقولك بس ما تتخضش

- مستحيل اتخض اكتر من كده وعموما لو راميه على خلفه تاني ابقى تفي على قبري

يابنتي انطقي طلعتي بظابيظي

- دايانا ماتت يا ضايع

طبيعي اني العب بلاي باك وادور في عائله مراتي الكريمه على مين دايانا
وعلى الرغم انها فقدت الامل في اني احفظ اسامي عائلتها الكريمه مش بسبب ضعف الذاكرة عندي ولكن سبب العدد المهول الذي يتعدى امكانيات الذاكرة البشريه الي المفروض احفظة إلا اني حاولت

وعبثا احاول معتقدش اني قابلت عندهم حد اسمه دايانا خالص
قلت اكيد واحده صاحبتها وانا مش عاوز اجرح محاسيسها واسألها دايانا مين
برضيك عبثا احاول انا عارف صاحباتها كلهم مفيهومش دايانا خالص

يانهار طيب تبقى تبعي انا

انا؟ ازاي انا معنديش حد لا في العائله ولا في اصحابي اسمها ديانا برضه

يادي النيله مبدهاش اسأل بقى وامرك لله

- دايانا مين يا حببتي؟

نظرة استعراب ممزوجه باندهاش وبها خليط من الاستنكار وعدم التصديق

- دايانا !!!! مش عارف دايانا

- ياستي بس لسه صاحي ونافوخي مش مجمع كويس دايانا مين؟

- الاميرة دايانا


ونزلت علي الكلمه وسكت ( اكيد مش حزن عليها يا سيدي )

- الاميرة دايانا مين ؟( ده انا بعد دقيقه حداد على عقلي الي مات اثر حادث اليم )


- الاميرة دايانا مرات الندل شارلز وحبيبه دودي الفايد

ده انا فكرت كده فعلا صح وده مش هزار دي بتتكلم بجد وهي دي المقصوده

في هاذوة اللحظة كان عندي مجموعه بدائل بافاضل بينها

ياترى ارميها من الشباك؟ احنا في الدور التاني مش هيحصل لها حاجه

اولع فيها ؟ معنديش بنزين في البيت

ماهو مش ههدى غير لما اعمل فيها كارثه قوميه

يعني انا اتنطر من على سريري بالشكل المأساوي دة ويتم ايقاظي بالطريقه دي واسكت

لا مونكن ابدا

بختها الطين اننا كنا بايتين عند حمايا العزيز

فرصه الانتقام يا بنت سلطح بابا

وهنا انطلقت بصوتي الجاهوري

يا عالم يا هو حد ياخد مراتي ويجيب ربع جنيه مخروم


حمايا طبعا جه زي الصاروخ وراه حماتي واخوات المدام

- فيه ايه ايه الي حصل

- فيه ايه ؟ اسمحلي اقول لك ومتزعلش مني انك مخلف مختله عقليا وكان لازم تحطها في مستشفى الامراض العقليه من زمان

- ليه يابني تف من بقك ( دي حماتي طبعا )

- طيب انا مجنون وانتو عقلاء اسمعو وعوا وحد يقولي اعمل فيها ايه

وحكيت القصه بمنتهى الامانه العلميه ( وطبعا انا باحكي ومراتي شغاله نهنه زي ماهيه بس مش عارف هل علشان المرحومة ولا علشان الفضيحه الي عملتهلها.


بعد ما خلصت حمايا رمى زوجتى الجبيبه بنظرة بصراحه لوحدها اشفت غليلي الي هي كانت ياعني حاجه من بين يا بنت المجنونه الى لله يفضحك زي ما دايما مجرساني حاجه كده ظريفه جدا

حماتي طبعا حبت تلطف الجو فقالت لمراتي

-خلاص يا شوشو بتعيطي ليه ده ضايع بيهزر ومش زعلان ولا حاجه

والنبي انتي طيبه يا حاجه لا انا زعلان بقى وعاوز اولع فيها بجاز

تفتكرو رد مراتي ايه؟

- انا عارفه ان ضايع بيهزر وده انيل لانه مش حاسس بيه وبالحزن الي انا فيه





ثم قال لها مفيش فايده يا صفيه غطيني وصوتي

الأربعاء، 25 مارس 2009

افرفشكم شويه

مش عارف حاسس ان فيه موجه اكتئاب عامه عند الناس الي بقرأ لهم ومش عارف هل ده اكتئاب الربيع زي ما هاني قال في نط في الكوز ولا دي حاله قرف عامه؟


عموما انا اصلا مليش مزاج اكتب اي حاجه وعندي برضيك حاله قرف وتهييس قويه جدا ففكرت طويلا تعمل ايه يا واد يا ضايع تعمل ايه يا واد يا ضايع قلت نحاول نخرج من الحاله الطين دي ونفرفش شوية


عملت تجربه في ستوته امبارح ونفعت قلت اشطه نعممها

فقلت اديها شويه نكت عن المتزوجين وربونا يستر

خدو عندكم


- سودانيه لبست قميص نوم أحمر وقالت لزوجها دلعني قلها الزوج : يافحم يامولع

- مره واحد بيقول لمراته تعرفنى انى بحب فتراك اوى راحت مراته قالتله وانا بحب سمير اوى قلها يا ويله فتراك دى مربه قالتلو وسمير ده عسل

- مرة ولد صغير بيقول لمامتة هو الرجل دة بيبوس اختى ليش قالتلة امة علشان هايتزوجها قالها الولد طب بابا هايتزوج الشغالة امتى

- مرة واحد سئل ابوة هو صحيح الحب اعمى .!! قالة ابوة شوف امك وانت تعرف

- قال شخص لزوجته: قولي للأولاد أن يناموا فقالت الام: للاولاد من ينام أولا أعطيه جنيه فنام الأب


- واحد زوجته تريد تسافر بريطانيا وقالت الزوجة للزوج :- إيش تريد أجيبلك من بريطانيا قالها بنت بريطانية وبعد ما رجعت قال الزوج لزوجته :- وين البنت ؟ قالت :- بتجي بعد 9 شهور

- عريس عصبي يوم فرحه كتب في بطاقة الدعوة: الزفت اللي هايجي ميتأخرش...واللي مش جاي في ستين داهية ... والعيال الرذلين الصغيرين يتخمدوا فى البيت..... و اللي هاتجيب موبايل كاميرا هفقع لها عينيها الاتنين....وابقوا اطفحوا في بيوتكم .. كفايه اللي دفعته للموكوسه العروسه.... اللي هتمد ايدها عالتورته هقطعهالها ..وابقى حلي في البيت ياختي انتى وهى .. منتو زي القطط تاكلوا وتنكروا .... الرقص ممنوع .. الضحك بصوت ومن غير صوت ممنوع...... وابقى عيل لو اتجوزت تانى

- مرة واحد ضاع حماره رجع قال لمرته:الحقي الحمار ضاع قالتله:ولا يهمك دخلتك علينا بتسوى100حمار

- مرة دكتور دخل عنبر فى سراية المجانين لقى واحد بيضرب نفسة بالشبشب سأل الممرضة ماله ده ؟ قالت أصله كان بيحب واحدة ومتجوزهاش ..دخل العنبر الى بعده لقى واحد بيخبط دماغة فى الحيطة قالها وده ماله قالتله اصل ده الى اتجوزها

- واحده بتقول لجوزها: تعالى ودينى المستشفى .. ماما هناك وعندها حالة تسمم ... راح جوزها رادد عليها : لازم عضت لسانها بالغلط ؟؟

- واحد جدته عيانة و رافضه الاكل فسألها تاكلى مهلبية والا اجوزك.. قالت له لأ يابنى المهلبية ناشفة على سنانى

- واحد و هو بيموت بص لمراته بصه كلها رومانسيه و قالها : انا لما اترفدت كنتي معايا ، و لما عييت وقفتي جنبي، ولما فلست برضوا كنتي معايا ، و دلوقتى لسا جنبي ، مسك ايدها بحنيه و قالها : مش عاريف ليه حاسيس انك نحس

- مرة واحد بعد سنة من زواجة صحى الصبح وقال لمراتة صباح الخير يا انسة قالتلة ,ماهو من خيبتك يا منيل

- اتصل واحد على زوجته وقال ليها "انا ربحت مليون دولار جهزي شنطتك بسرعة" فقالت الزوجة" طيب احمل معاي ثياب صيف أو شتاء؟" فرد عليها"احملي كل اللي عندك المهم مش عاوزك تكوني في البيت لما أرجع

- فيه حوطيه تبي تفرح زوجها في اول ليله زواجها قالت: انا حامل

- واحد غبي دخل على زوجته ليلة الدخله لقاها مستحيه قال: الحرمه اول مره تتزوج

- صيدلانية اتصلت بزوجها سالتو بتحب الفاصولية حب ولا تحاميل

- واحد تعبان قوي بيقول لمراته ما تقومي تذبحي لنا الأرنب ده . ردت عليه وقالتله علي ايه ياموكوس .قالها علي ملوخية.

- واحد صعيدي ركب تاكسي قعد مراته جنب السواق علشان ميبصلهاش في المرايه

- واحد قاعد في أمان الله بيقرا الجرنان، وفجأة جت مراته وضربته بغطا >>الحلة فوق دماغه .. طرررررخ!!! الزوج: "فيه ايه يا بنت الحلال؟ ليه كدا؟؟؟" الزوجه:"ايه الورقه اللي في جيب بدلتك ومكتوب عليها "سوسو"؟؟" الزوج: "يا بنت الحلال، ده أسم الحصان اللى بنشجعه في السباق!" الزوجه صدقته وراحت لحالها... بعد اسبوع، الزوج قاعد في أمان الله يقرا الجرنان، وفجأة جت مراته وضربته بغطا الحلة على راسه !! الزوج: "خير يابنت الحلال في ايه تاني؟؟" الزوجه:"حصانك على التليفون

- نساء العالم اتحدن وقررن ان لا يقومو باى اعمال فى المنزل وبعد اسبوع >>تجمعو ليعرفوا النتائج الأضراب>>>>فقالت الزوجة الفرنسية "انا قلت لجوزى ميشيل انا مش هعمل حاجة فى البيت الاسبوع دة كلة" وقالت "اول يوم ماشوفتش حاجة، تانى يوم ماشوفتش حاجة، تالت يوم بدا يغسل ويمسح" وقالى "انتى بتتعبى اوى يا حبيبتى".>>وقالت الزوجة الانجليزية "انا قلت لجوزى انا مش هعمل حاجة خالص فى البيت الاسبوع دة"، اول يوم مشوفتش حاجة، تانى يوم بدا يعمل الاكل تالت يوم عشانى وغدانى برة.">>جت المصرية وقالت "انا قلت لابو العيال انا مش هعمل حاجة فى البيت الاسبوع دة" وقالت "اول يوم ماشوفتش حاجة، تانى يوم ماشوفتش حاجة تالت يوم بدات اشوف شوية بعينى الشمال."

- مرة واحدة قالت لجوزها "إهدى حبيبى كدة وأرجع زى زمان"، الراجل طلقها

-مره واحده بتقول لجوزها "تصدق إن أنا كل يوم بحلم بيوم جوازنا" قالها >>"هى لسه الكوابيس دى بتجيلك؟

- مرة حماة أرادت اختباره اجواز بناتها، فاخذت الأول وعملت نفسها اتزحلقت في البحر فنزل وراها وانقذها، تانى يوم وجد عربية بيجو ومكتوب عليها "هدية من حماتك" وفعلت نفس الشئ مع الثانى فاحضر لها الاسعاف ووجد فى تانى يوم عربية بيجو ونفس الرسالة، أما الثالث فسبها تغرق، >>ففى اليوم التالى وجد عربية مرسيدس ومكتوب عليها "هدية من حماك

- واحد متجوز وقاعد في البيت وبيبص كتير في عقد الزواج، مراته قالت له: "بتبص في عقد الزواج ليه يا حبيبي؟" قالها: "مش عارف يا حياتي المأذون كتب تاريخ انتهاء العقد فين

- واحد نشر في إعلانات مبوبة :مطلوب زوجة!!! تاني يوم جاله 100 جواب فيهم نفس الرد: تاخد بتاعتي؟؟

- واحد بيقول لمراته ... انا النهاردة عايز رومانسية فى البيت ... راحت الزوجة سألت امها : يعنى ايه رومانسية ؟؟ الام : مش عارفة بس احتياطى إنقعى الرز

- مرة اتنين لسة متجوزين جديد وخرجين ومشين على الكورنيش الزوج:شايفة القمر يا قمرايا الزوجة :شايف النيل يا منيل


عارف اني هتقطع النهاره لكن ولا يهمني
رداله ولاد رداله ومعندناش Feminine side كمان

الأحد، 22 مارس 2009

هختارها هيه



منين اجيب حب اقدمة ليك

ولا اجيب كلام يوصفه ليك

حوليه كل الناس وبدور عليك

ومن بين كل الدنيا بتوحشني عنيك


لو كنت اعرف اشرح او انظم الكلمات

كنت شبكتلك حروفها باعذب النغمات

وعملت لك قصه يقولوها في الحكايات

قصه حب مقدرتش توصفة الكلمات





قصتي معاكي ما ليها بداية ونهايه

قصه حبي ليكي بتحكي اجمل حكايه

رسمت حروفها شفايف طارحه 100 وردة

ومزينها رقه ملهاش مثيل الزمن ده





لو يوم قالولي اوصفك راح اقول حورية
ولو قالوا شقاوتك راح اقول جنية
ولو قالوا كيانك راح قول حنية
ولو عرضوا عليا الدنيا اقول دنيتي هيه


السبت، 21 مارس 2009

ست الحبايب يا حبيبة

النهارده لازم اعمل حاجه بتاعه 100 تليفون

اصلي محظوظ بكم رائع من الامهات

ولازمن ولا بعد اقول لكل واحده منهم كل سنه وهي تملاء حياتي برضاها ودعائها لي



ولكن هناك امي الجميله

التي لن تكفي كلمات ان تكون جملة واحده توفي لها اقل من قدرها

ولن اتمكن من صياغه جملة اهنئها فيها بعد الام

ولكن يكفي انها تعرف انها اعظم ام في هذه الحياة

واحن ام


امرأة صنعت رجالا ونساءاً تطاول رقابهم عنان السماء

امرأة صاغت ببساطتها اسطورة في البذل والجهد

امرأة تأبى إلا ان تحمل هموم ابنائها إلى اليوم على الرغم من عمرها


كل عام وانت في اتم صحة وعافية ورضا عنا

اقبل يدك التي لم تحرميني حنانها يوما

ولم تنسي ان ترفعيها بالدعاء لي يوما


فلا حرمني الله منك ولا من رضاك علي



حماتي وامي الثانيه


امرأة لا يمكن ان اصفها

ام لكل ما تحمله الكلمه من معنى

من اول يوم تزوجت ابنتها ووضعتني في محل ابنها الاكبر

لم تبخل على يوم بنصائحها ولا حنانها

ولن انسى لها مواقفها معي في بدايه حياتي

ولا وقوفها في صفي في كل مشكله بيني وبين زوجتي

هي ام ثانيه حباني الله بها ليزيد فضله وكرمة علي


كل عام وانتي بصحه وعافيه

تملأين علينا جميعا حياتنا املا ومحبه تملكين منها ما يكفي ان يملأ العالم محبه



اختي الغاليه

تخيلوا على الرغم من ان فارق العمر بيني وبينها اقل من عامين إلا انها ابت إلا ان تكون ام منذ نعومة اظفارها

لن استطيع ان اصف حنانها وحبها لاخوتها

ولن اقدر على وصف ما بذلته وتبذله لاخوتها حتى اليوم

الناصحة الامينه

كاتمه السر

السند وقت الشده

هذه هي اختي الحبيبه

والتي تستحق ان اقول لها كل عام وانتي بخير ليس في عيد الام فقط

ولكن كل يوم

دمتي في حياتنا نورا



زوجتي الحبيبه

ام في عطائها بلا حدود ولا قيود ولا شروط

تعرف متى تأخذني في حضنها الدافئ كأم وتربت بيدها الحانيه على كتفي لتزيل عني هموماً وهموم

تعرف كيف تودعني كل يوم بدعاء جميل ليطرح الله البركه في يومي ويعينني علية

تعرف كيف تداعب الطفل الذي بداخلي تقلل من تمردة وتهدئ من روعة

هي زوجتي

وحبيبتي

وامي

وصديقتي

وكل دنيتي


كل عام وانت حبيبتي

كل عام وانت في قلبي وحياتي

كل عام وانت اجمل من سابقه



كـــــــــــــــــــــــــل عـــــــــــــــــــــــــــام وكــــــــــــــــــــــــــل ام طيبـــــــــــــــــــــــه