لندن الدور الثاني

ده باختصار عناوني الحالي لاي مراسلات




العائلة الكريمة تقريبا اتفقوا على انهم يجننوني

يعني مش كفاية عليا زعيم الشعب الشومبونجي

لا المدام كمان فضيت لي

قررت انها تسيب الشغل وتتفرغ ليه

ليه؟ هو انا اشتكيت

والله ما حصل

المهم اللهم انا لانسألك رد القضاء ولكن نسألك اللطف فيه

ظريف انك تكون متجوز من واحدة مثقفه وكلاس واستايل

ده جميل في مجمله وعلى الاقل هتعرف ان الاولاد هيتربو كويس

بس هتدفع التمن يا داميل

وخصوصا من الي هتعانيه معاها

الحكايه بدأت تزيد وآخد بالي منها من بضع شهور

من بدايه الارتداد لمرحلة المراهقة لزوجتي الحبيبه

اه هي طول عمرها بتتكلم فرانكو اراب

بس دلوقتي بقت بتتكلم فرانكو الفرانكو بس

الاراب مات في حادث اليم معاها

ماهياش ازمة مانت يا واد يا ضايع مش ضايع في العنجليزي برضه وماشي حالك

ده الي كنت فاكرة

هحكي 3 مواقف بس هتحسو فيهم بالي اقصده

الموقف الاول

كنت بالكم صديقه على الماسنجر

عادي يعني مش ازمة وعندي على الماسنجر حاجه بتاع 300 صديق وصديقه

وكل يوم بليل بقعد ساعه تقريبا ارغي معاهم

المهم كنت باكلمها وجائت فراشتي الجميله تتهادى حامله كوبين من الاميريكان كوفي

وجلست جانبي

- بتكلم مين يا حبيبي

- بكلم فلانه

- ايه ده انت بتكلم دي؟

- يعني ايه دي ؟

- ايه ده انت ازاي تكلم واحده low life

انا الكلمه ضربت في النوفوخ وقلت يا واد يا مصري الكلمه دي عدت عليك فين؟ هل اخدتها في تانيه ولا تالته؟

المهم قعدت اقلب في الجمجمه وفي كل المصطلحات الي عدت عليه بدايه من السعيديه إلى الدليل الفني لشبكات سيسكو ملقتش المصطلح ده عدى عليه خالص

مش عارف ليه ساعتها معرفتش اتقمص اي شخصيه غير شخصية اللمبي في الي بالي بالك والمزيعه بتسأله وهو بيبص لها وبيهز دماغه وبيقول لها

- ايوة نعم حضرتك

- ايه يا بيبي ازاي تنزل بمستواك انك تكلم واحده low life زي دي؟

- ايوة معلش علشان بس اعرف اجاوبك ممكن سؤال ولو مفيهاش اباحه؟

- يعني ايه low life دي من غير فضايح

- low life يعني low life افهمهالك ازاي دي ؟ معقوله مش عارف يعني ايه low life؟

- لا وحياه مماتي وبباتي معدت عليه في اي منهج

- low life يعني كده زي ما تقول مثلا انها low life

- اه كده فهمت مش تقولي من الاول كده

- لا low life يعني تحت قوي يا بيبي حاجه كده وحشه خالص

- بيئه يعني؟

- ايه بيئه دي انت هتبوظلي العيال

- ايه ياستي هو انا قلت كلمه ابيحه؟

- اه ايه بيئه دي ؟ دي كلمه ميقولهاش غير واحد low life

يا دين امي

يامصبر الوحش عالجحش يارب

مش عارف ليه كنت عاوز في اللحظة دي اديها بوكس في مناخيرها

هنا تحديدا تراقص في عقلي مشهد يوسف وهبي وهو بيقول اهي صوتت بالبلدي بنت صلطح بابا

المهم خلص الموقف ده وخلاص

مفيش بعدها ب 10 دقائق لاقيت ثلاثي اضواء المسرح ومعهم واحد نص متر لسه داخلين هجوم على غرفتي المسكينه بشكل يخليك تقول

الطف بنا يا لطيف

انا هعترف لوحدي ومحدش يمد ايده

ابتدرت آنستي لولو الكلام لتبرير الهجمه المرعبه

- بابا تخيل فيه ولد قليل الادب جدا في المدرسه عندا

- ليه يا حببتي عمل ايه

- قال ال F word وهو بيتخانق مع واحد

- مين ؟ قال ايه يا حببتي

- ال F word يا بابا تخيل

ايه يا ددعان هو احنا بقينا قدام اوي كده؟ هو ال F بقت شاتومه وانا معرفش

طبعا حببتي قاعده جنبي حست بحوستي فبصت ليه وعلى وجهها ابتسامه علشان متحرجنيش قدام الولاد

- الكلمه العيب يا حبيبي

زي مانا حمار جملتها متمكنتش انها تحولني من حمار لجحش حتى

هنا رأى زعيم الشعب الشومبونجي حيرتي فحب ان يحسم الموقف علشان منضيعش وقت

- ايه يا بابا الكلمه الي هيه F U C K

شوفتو الادب

مرضيش يقولها انما قالي الاسبلنج مش مامته قائد طابيه؟

هو يوم مزفلط من اوله هيقف دلوقتي ليه

بتقول ايه يا حبيبي؟

جبت الكلمه دي منين؟

طيب هنا وقفه وعاوز اراء الساده المستمعين

هل انا سألت سؤال ابيح؟

او هل هو سؤال غبي زي ليه الشمس بتطلع الصبح مثلا؟

امال ايه سبب نظرات القرف والازبهلال الي قابلتني من الجميع بعد هذا السؤال؟

و 5 في صوت واحد

انت آخر مرة اتفرجت على فيلم اجنبي كان امتى؟

اه انا فعلا غبي ومتأخر

- هم دول يا حببتي الي هبوظهم بكلمه بيئه؟

نظرة تحذيريه من المدمرة الامريكيه يو اس اس مراتي

خلاص ما علينا

- طيب يا حبايبي طالما انه ولد قليل الادب كده يبقى خلاص ملكوش دعوة بيه خالص لانكم مبتصاحبوش غير الناس المحترمه الي زيكم

- ايه ده يا بابا انت فاكرة صاحبي؟ لا طبعا ده بس معانا في المدرسه لكن كده او كده مش ممكن اصاحبه ده low life خالص

ثم قال لها مفيش فايده يا صفيه غطيني وصوتي

الموقف الثاني

انا من عشاق سهير زكي

محدش يفهمني غلط

بحب الرقص الشرقي جدا طول عمري

عادي يعني فن ياجماعه

وبعدين سهير طول عمرها راقصه محترمه

المهم

جالس انا وحرمي المصونه والجوهرة المكنونه بنتفرج على وصله رقص لسهير

عادي جدا

- حلوة قوي واحلى حاجه عندها ال Abdominal muscles بتتحكم فيها حلو قوي؟

- Abdominal muscles ؟ ده رقص يا حببتي

- ايوة ماهو معتمد في المقام الاول على ال Abdominal muscles حتى اسال فلانه هي مش رقاصه؟

- انا هسال رقاصه واقول لها ال Abdominal muscles؟ علشان تفتكرني باشتمها وتشبشب لاهلي

- ليه هي مش تعرف يعني ايه Abdominal muscles؟

- لا يا حببتي تعرف بروبروء على رأي منى زكي

حسبي الله ونعم الوكيل فيك يا فخري

الموقف الثالث

- بتكلمي مين على الماسنجر يا روحي؟

- ده فلان يا حبيبي

- هو فين الجزمة ده انا مشفتوش من كام يوم هاتيه علشان اكلمه

- لا استنى علشان بنتناقش في موضوع مهم وكمان فيه بنوته شغلاه وشكله هيدخل القفص قريب

- طيب قدامك كتير

- لا علطول

اتغديت وشربت الشاي وفردت شويه على السرير

مش كتير

ساعتين

- ايه يا ماما بترغو في ايه؟

- يووووووووة يا بيبي حاجات كتير اصل فلان ده اكتر واحد باعرف اتكلم معاه بعد فلانه انتيمي

- ليه يعني؟

- اصله عنده تواصل حلو قوي مع ال Feminine side بتاعه فبيعرف يفهمني ده حتى رأي فلانه وفلانه كلنا بنعتبره افضل صديق

- استني بس عنده تواصل مع مين ؟

- مش مين عنده تواصل مع ال Feminine side بتاعه

- هو عنده Feminine side؟ انا اخر مرة شفته كان راجل

- ماهي دي مشكلتي الوحيده معاك.

- ايه هيه معلش علشان افهم

- انت معندكش اي تواصل مع ال Feminine side بتاعك

- ايه ده هي وصلت نغلط في بعض. احترمي نفسك يا هانم. Feminine side ايه الي هيبقى عندي. انا راجل قوي

- اوف يارب هفهمه دي ازاي؟

- تفهميني ايه؟

- يا بيبي كل واحد جواه Feminine side وكمان Childish side

- بصي من الاخر يتقال عليه عيل ماشي ممكن اعديها لكن ست ؟ دي كلمه تطير فيها رقاب. ده احنا رجاله قوي قوي لامؤاخذه

- ملهاش علاقه يا حبيبي بانك عيل او ست ده الجانب الي بيخليك تقدر تحس بشعور الانثى وتفهما وتحس بشعور الطفل وتفهمه؟

- دي نظريه مين بالصلاة عالنبي. يعني علشان افهمك لازم يكون عندي Feminine side ليه انشاء الله ما انا بفهمك وبحس بيكي وكل حاجه ومعنديش الهباب ده

- اه انت بتفهمنى بس مش زي فلان هو بيحس بالي عاوزة اقوله من قبل ما اقول بمجرد ما احكي الموقف

- بقول لك ايه متخلينيش اطلع ال Masculine side على جتتك النهارده. انا كده وهعيش كده وهموت راجل بأذنك يا رب برضه

آل Feminine side آل